OEKUSI, 13 Outubru 2025 (TATOLI) –Autoridade Rejiaun Administrativa Espesiál Oekusi Ambeno (RAEOA), liderada Régio da Cruz Salu, fó sai katak, Autoridade RAEOA obedese implementasaun rezolusaun Governu númeru 54/2025, loron 02 fulan-Outubru kona-ba kanselamentu ba lisensa operasaun jogu no aposta online iha Oekusi, tanba ho prezensa atividade referida prejudika no fó prejuizu ba povu Oekusi liu-liu joven sira inklui mós igreja no sosiedade sívil.
Notísia relevante:PSIK ho SNI buska apreensaun no desmantela jogu online ilegál iha Oekusi
Prezidente Autoridade RAEOA, Régio da Cruz salu, fó sai nia deklarasaun ofisiál ne’e, liuhusi konferénsia imprensa, ne’ebé hala’o iha salaun Gabinete Prezidente Autoridade RAEOA, iha Oekusi, ohin.
“Ami obediénsia no implementasaun ba rezolusaun Governu nian, kona-ba kanselamentu ba lisensa operasaun jogu no aposta online iha Oekusi, ita hotu akompaña, rona no hatene ona katak foin lalais, Guvernu liuhusi desizaun Konsellu-Ministru, hasai ona rezolusaun Governu Númeru 54 /2025 hodi halo kanselamentu ba lisensa operasaun jogu no aposta online iha Timor-Leste tomak, iha Oekusi rasik antes rezolusaun Governu ne’e anúnsia, akontese ona aktu buska aprensaun iha 25 Agostu 2025 ne’ebé koordenadu husi orgaun kompetente Estadu nian, ba atividade ilísitu kríme ligadu ba jogu no aposta online iha otel Oé-upu,” Régio Salu deklara iha konferénsia imprensa ne’ebé iha Oekusi, ohin.
Nia konsidera, asaun buska aprensaun iha otel Oé-upu, prejudika no fó prejuízu ba povu Atoni rasik husi labarik ki’ik, feto-mane to’o ferik no katuas sira, inklui mós instituisaun sira hotu hanesan igreja no sosiedade sívil hotu, tanba otel Oé-upu nu’udar, aset ka patrimóniu própriu RAEOA nian, tuir lei númeru 3/2014, loron 18 fulan-Juñu, alterada datoluk ho lei númeru 18/2023, loron 30 fulan-Novembru.
Notísia relevante:Kazu otél Oé-Upun, arguidu na’in-neen kontinua detein iha sela detensaun kalan ida
Nia akresenta, rezolusaun ne’e tama tiha ona iha vigór no efetivu imediatamente. Tan ne’e liuhosi konferénsia ne’e, Autoridade RAEOA hakarak espresa no deklara nia obrigasaun no obedesimentu ba objetivu no ezijensia Guvernu Timor-Leste nina, ne’ebé hatuur ona iha Rezolusaun Governu númeru 54/2025 ne’e, ho nune’e mak Autoridade RAEOA hakarak husu no apela:
- Oekusi-oan no parte hotu, liu-liu iha otel Oé-upu identifikadu no hetan ona buska aprensaun koordenadu iha loron 25 Agostu 2025 liubá, husi orgaun kompetente Estadu nian ligadu ho atividade ilísitu krime ba jogu no aposta online, ne’ebé hala’o iha Terra de Nossa Senhora do Rosário, Terra da Santa Cruz, Terra de futuro povu Atoni Oekusi nian to’o ohin loron atu hapara, desmantela no hasees hanoin sira, ho aktu hirak-ne’e, sai husi área jusridisaun RAEOA, hahú kedan husi Rezolusaun Guvernu kona-ba kanselamentu ba lisensa operasaun jogus no aposta online hahú efetivu.
- Autoridade RAEOA hakarak husu no apela mós ba parte potensiál afiliadu sira seluk hotu, ne’ebé iha koñesimentu, iha afiliasaun no koneksaun direitamente no indiretamente ba atividade ilísitu krime ligadu jogus no aposta online ne’ebé identifikadu, no hetan ona buska aprensaun koordenadu fulan Agostu liu-ba.
- Autoridade RAEOA sei kontinua serbisu hamutuk ho institusaun Estadu relevante sira atu observa no superviziona implementasaun ba rezolusaun Governu nian ba kanselamentu lisensa operasaun jogu online ne’e.
Notísia relevante:Rogério Lobato espera atuasaun PSIK no SNI iha otel Oé-Upun tuir lei no orden
Tanba ne’e, nia reforsa tan katak, nu’udar Prezidente Autoridade RAEOA, hakarak kontinua apela no husu ba entidade no komponente sosiál, kulturál no polítiku hotu iha Oekusi, hodi kumpre no ezerse aderénsia no obedesimentu ba objetivu no efeitu husi Rezolusaun Governu númeru 54/2025 loron 02 fulan-Outubru.
“Husu Oekusi-oan sira hotu-hotu atu fó liman ba malu, atu ko’alia ba malu, la haree ba kór, no la limite ita nia-an ba malu, tanba de’it partidu no afiliasaun ne’ebé lahanesan iha tempu no períodu kampaña demokrátiku nian. Maibe, nu’udar povu no maun-alin, família bo’ot husi rain no povu Atoni de’it, ho nekaf mese ma ansaof mese, ita tenke ko’alia ba malu, tulun malu no kolabora, kona-ba ita-nia povu no ita-nia rain enklave, nia di’ak no legadu rasik, hamutuk ba moris di’ak ho orgullu ba ita-nia ukun rasik aan kontinua hamutuk halo tuir ezijénsia no prudénsia husi rezolusaun nian, husu ita hotu atu haree, rekuñese no promove Oekusi nu’udar uma bo’ot, ema hotu nian,” nia apela.
Notísia relevante:PSIK ho SNI monta ona liña polisiál ba eskritóriu rua iha otél Oé-Upun
Entretantu iha loron 25 Agostu 2025, Polísia Sientífika Investigasaun Kriminál (PSIK), hamutuk ho Serbisu Nasionál Intelejénsia (SNI) hala’o vizita supreza ida, hodi halo buska no apreensaun no desmantela ba jogu online ilegál rua hanesan esplorasaun jogu ilisita kriminoza, no mós burla informatika rede scam call centre transnasionál, ne’ebé instala husi empreza internasionál Seagull Resort husi Malázia iha otél Oé-Upun Oekusi.
Husi buska no apreensaun ne’e, nia prosesu konsege tama to’o tribunál ho rezultadu arguidu na’in-neen kumpre prizaun preventiva iha prizaun Bekora.
Jornalista: Abílio Elo Nini
Editór: Rafael Ximenes de A. Belo
