VIKEKE, 21 Outubru 2025 (TATOLI)—Ministériu Planeamentu no Investimentu Estratéjiku (MPIE) liuhusi Diresaun Jerál Ordenamentu Territóriu (DJOT), sosializa estudu prelimináriu ba identifikasaun utilizasaun solu ezistente iha área urbana ba autoridade Munisípiu Vikeke.
Iha aprezentasaun ne’e, Diretora Nasional Planeamentu Urbanu MPIE, Grace Natalia Lopes de Carvalho, haktuir elaborasaun planu territóriu ne’e sei hala’o iha tinan 2026 ba utilizasaun solu ezistente iha área urbana iha Postu Vikeke Vila nian.
“Ha’u sente ba asuntu ordenamentu territóriu ita familiár ona tanba foin lalais ita entrega ona dokumentu planu ordenamentu munisipál nian ba Autoridade Vikeke. Entaun, ami-nia parte mak kontinua elabora ita-nia planu detallu ne’ebé ita bolu utilizasaun solu ezistente iha área urbana. Liuhusi ida-ne’e ita sei define kuadru estratéjiku ba termu okupasaun ba iha territóriu Munisípiu Vikeke nian atu fahe ka define área sira hanesan urbana no área rurál mak ida-ne’ebé,” Grace ba jornalista sira iha Salaun Administrasaun Vikeke, Tersa ne’e.
Nia aprofunda, bainhira define hotu área urbana no rurál sei hetan aprovasaun, DJOT sei kontinua halo intervensaun ba perimetru urbanu ne’ebé mak define ona husi planu ordenamentu territóriu munisipál.
“Tuir planu, utilizasaun solu ezistente iha área urbana iha Postu Vikeke Vila nian ita sei halo elaborasaun iha tinan oin tanba pakote hamutuk ho Munisípiu Lautein, Dili no Vikeke nian. Tinan ida-ne’e ami foku ba munisípiu tolu hanesan Ermera, Bobonaru no Baukau,” Grace haktuir.
Nia dehan, antes tama tinan 2026, DJOT inisiativa prodús matadalan ba estudu prelimináriu ba identifikasaun utilizasaun espasu ezistente iha perimetru urbanu no levantamentu mapa ne’ebé liuhusi drone.
Iha fatin hanesan, Sekretáriu Munisípiu Vikeke Asuntu Planu Integradu Dezenvolvimentu Investimentu (PIDI), Acacio Sarmento informa ekipa MPIE aprezenta planu ordenamentu territóriu ba funsionáriu sira ba mapeamentu ordenamentu territoriál ba Munisípiu Vikeke.
“Liuhusi aprezentasaun ida-ne’e ramata sei forma ekipa hodi la’o hamutuk ho ekipa nasionál hodi rekolla dadus ba ordenamentu iha Munisípiu Vikeke. Nune’e, sorumutu ne’e durante loron rua ba funsionáriu sira tenke partisipa to’o hotu, atubele hatene planu sira-ne’ebé realiza,” nia tenik.
Entretantu, partisipa iha aprezentasaun estudu prelimináriu ba identifikasaun utilizasaun solu ezistente iha área urbanu husi diretór munisipál, Komandante Polísia Nasionál Timor-Leste (PNTL) Eskuadra Vikeke Vila no funsionáriu sira.
Jornalista: Vitorino Lopes da Costa
Editór: Xisto Freitas da Piedade
