DILI, 21 Outubru 2025 (TATOLI)—Governu Konstitusionál da-sia (IX) liuhusi Ministériu Saúde rekoñese katak kada postu saúde no sentru saúde sira iha teritoriu nasionál ne’e sei menus pesoál saúde sira.
“Loos ita rekonese katak Timor-Leste ita iha suku 400-resin mak iha ita-nia rain, maibé maiória husi suku sira-ne’e suku 341 mak iha postu saúde, entaun presenza postu saúde ne’e ninia funsionamentu atu atende ita-nia populasaun sira iha suku refere,” Vise–Ministru ba Fortalesimentu Instituisionál Saúde, José Magno dos Reis, hateten ba jornalista sira iha salaun CNE, Kolmera, ohin.
Nia dehan, Ministériu Saúde haree katak sei iha suku 100-resin mak MS tenke konstrui postu saúde sira tanba iha sentru saúde hamutuk 70-resin mak iha ona fasilidade saúde iha vila laran, agora Governu la’ós haree de’it ba iha nivel suku maibé haree mós ba iha nivel aldeia ne’ebé mak sira distánsia dook-liu husi populasaun nia hela fatin, iha aldeia refere mai iha postu saúde iha nivel suku.
“Ami agora daudaun identifika postu tratamentu iha fatin-fatin sira-ne’ebé mak ita tau agora. Númeru exata ha’u haluha, maibé iha aldeia ne’ebé mak populasaun barak distánsia mai postu saúde dook ne’e, ita tau postu tratamentu iha ne’eba. Normalmente ita tau parteira ida, enfermeiru ida ho saúde publika iha ne’eba. Ezemplu, iha RAEOA ne’e kuaze ninia rede ba fasilidade saúde iha ne’eba kapaas tebes, tanba populasuan barak ita tau postu tratamentu iha ne’eba hodi asesu ba saúde ne’ebé mak di’ak,” nia hateten.
Tanba ne’e, ba oin, Ministériu Saúde sei haree kapasidade Orsamentu Jerál Estadu (OJE) nune’e aumenta tan postu saúde sira-ne’ebé mak seidauk iha ne’e, sei konstrui tan hodi tuir nesesidade ne’ebé mak iha.
Jornalista : Felicidade Ximenes
Rdotór : Cancio Ximenes
