DILI, 21 Outubru 2025 (TATOLI)—Universidade Indonézia hamutuk 65 sei partisipa iha espozisaun Ensinu Superiór Indonézia 2025, ne’ebé hala’o iha loron 28 to’o 30 Outubru, iha Pusat Budaya Indonesia (PBI), Dili.
Adidu Edukasaun no Kultura Indonézia iha Tior-Leste, Tasrifin Tahara, dehan espozisaun ne’e hatudu kompromisu Governu Indonézia nian atu habelar asesu ba ensinu superiór.
“Ami hein katak jerasaun joven Timor-Leste nian bele aproveita oportunidade ida-ne’e hodi hetan edukasaun ida-ne’ebé ho kualidade iha Indonézia no dezenvolve kapasidade rekursu umanu iha ensinu superiór,” Tasrifin Tahara dehan liuhusi nota komunikadu imprensa ne’ebé TATOLI asesu, Tersa ne’e.
Aleinde informasaun kona-ba edukasaun, nia dehan, espozisaun ne’e hatudu mós ajenda prinsipál rua seluk hanesan teste ba selesaun admisaun direta husi universidade ba partisipante sira no enkontru parseria entre universidade Indonézia no parseiru edukasaun Timor-Leste nian hodi hametin kolaborasaun akadémika, peskiza no troka estudante sira.
Espozisaun tinan ida-ne’e nian mak boot liu dezde nia inisiativa iha tinan 2016. Antes ne’e, eventu ida-ne’ebé hanesan rejista númeru record ida hosi vizitante hamutuk 5.147 iha tinan 2024, ne’ebé halo ida-ne’e sai hanesan espozisaun edukasaun nian ne’ebé boot liu iha Timor-Leste.
Husi tinan 2016 to’o Setembru 2025, Sentru Kulturál Indonézia iha Dili fasilita ona estudante Timor-Leste hamutuk 2.618 ne’ebé hetan eskema bolsu estudu oioin hodi kontinua sira-nia estudu iha Indonézia. Aleinde ne’e, kolaborasaun iha área formasaun profesór, kapasitasaun dosente no peskiza konjunta kontinua hametin.
Eventu ne’e hala’o durante loron tolu ne’ebé sei loke ba públiku ho gratuita husi tuku 9:00 dadeer to’o tuku 5:00 lokraik. Nune’e, estudante, profesór, inan-aman no públiku ne’ebé iha interese atu hala’o sira-nia estudu iha Indonézia atu aproveita oportunidade ida-ne’e.
Jornalista: Osória Marques
Editór: Xisto Freitas da Piedade
