DILI, 24 Outubru 2025 (TATOLI)—Governu liuhusi Sekretaria Estadu Formasaun Profesionál no Empregu (SEFOPE) hahú fó teste ba kandidatu traballadór Nova Zelandia na’in-11 iha pilotu dahuluk.
Kandidatu na’in-11 ne’e, tuir teste dahuluk iha faze entrevista antes sai traballadór Seasonál Rekoñesidu (RSE-sigla inglés) Nova Zelándia, ne’ebé observa direta husi Sekretaria Estadu Formasaun Profesionál no Empregu (SEFOPE), Rogério Araújo Mendonça no Embaixadora Nova Zelándia iha Timor-Leste, Hellen Tunah.
Sekretariu Estadu, Rogério Araújo Mendonça, hateten SEFOPE hamutuk ho Embaixadora Nova Zelándia, Hellen Tunah, ne’ebé esforsu-aan tebes iha porgrama mobilidade laborál ho naran RSE oinsá atu haruka traballadór timoroan ba servisu iha nasaun ne’e.
“Husi empregadór haat (4) mak mai husi Nova Zelandia, sira mak halo rekrutamentu direita ba ita-nia traballadór sira, iha faze primeiru mak sira na’in-11 agora tuir teste ne’e,” nia dehan ba jornalista sira iha salaun City 8 Manleuana, ohin.
Empregadór haat (4) ne’ebé iha ona Timor-Leste mak hanesan HORTUS ne’ebé mak halo uluk rekrutamentu ba timoroan na’in-11, enkuantu emlregadór seluk hanesan Team Work, Mr. Apple inklui mós HORTUS sei halo rekrutamentu iha fulan-Janeiru 2026.
Tanba ne’e, nia husu ba kandidatu na’in-11 iha faze dahuluk ne’e bainhira ba servisu tenke hatudu atitude no prestasaun servisu ne’ebé di’ak atu loke dalan ba timoroan seluk hodi bele servisu iha rai refere.
“Kandidatu na’in-11 ne’e la rejistu iha sistema Austrália nian, nune’e parte empregadór rasik mak foti sira-nia perfíl no halo ona entrevista ho sira, tuir planu SEFOPE sei expanda formasaun ba munisípiu hotu,” nia informa.
Iha fatin hanesan, Embaixadora Nova Zelándia mai Timor-Leste, Helen Tunnah, hato’o agradesementu ba SEFOPE liuliu ba apoiu tomak ne’ebé halo durante empregadór no ofisiál ba programa mobilidade traballu Nova Zelándia nian iha Timor-Leste.
“Empregadór sira-nia vizita durante semana-ida iha ne’e susesu tebes, sira konsege hasoru-malu ho unidade enviu traballadór no ofisiál sira SEFOPE nian. Aleinde ne’e, sira mós hala’o viajen ba Aileu, Maubisse, no Railaku, iha ne’ebé sira hasoru malu ho toos-na’in ba negósiu kiik sira,” Embaixadora ne’e dehan.
Tanba ne’e, nia husu ba joven sira atu aprende barak hodi bele susesu iha ida-idak nia futuru tanba ida-ne’e mak Governu nia hakarak. Tuir planu, tinan oin. sei halo rekrutamentu ho maneira manuál atu garante iha sistema ne’ebé loos ba empregadór.
Enkuantu kandidatu sira-ne’ebé lista naran iha ona sistema PALM Austrália nian maibé hakarak aplika tuir email ba iha vaga RSE Nova Zelándia hamutuk 3.000.00.
Jornalista : Alexandra da Costa
Editór : Cancio Ximenes
