DILI, 27 Outubru 2025 (TATOLI) – Sekretáriu Estadu Kooperativa, Arsénio Pereira, fó pose, iha segunda-feira ne’e, estrutura Kooperativa Família Ki’ik (KFK) no Kooperativa Tane Kbiit no Haburas Ekonomia Família (TABIHAE).
Arsénio Pereira hato’o apresiasaun ba kooperativa kréditu rua ne’e, tanba ho inisiativa hahú husi família no ikus mai sai kooperativa ne’ebé boot hodi apoia mós maluk sira seluk ne’ebé laiha kapasidade finanseira atu sustenta sira-nia moris.
“Kooperativa importante tebes, tanba sai baze ka ai-riin ba ita-nia ekonomia rai-laran”, governante hateten iha salaun Kongregasaun Putri Reinha Rosari (PRR) Manleuana, Dili.
Ho pose ida-ne’e, Arsénio espera katak ba oin kontinua envolve maluk sira ne’ebé seidauk tama kooperativa hodi hamutuk hadi’a ekonomia família atu kontribui ba dezenvolvimentu nasaun.
Iha fatin hanesan, Prezidente KFK, Lourenço Tla’an Quefi, relata katak kooperativa ne’e harii iha 2021 no daudaun iha ona membru hamutuk ema na’in-260. “Ohin loron simu pose ida-ne’e susesu ida, tanba susesu ne’e hahú husi ita”, nia dehan.
Nia adianta katak KFK nia membru sira kada fulan rai osan $20 no daudaun fundu ne’ebé sira iha hamutuk rihun $350. Osan ne’ebé sira rai sempre apoia ba maluk sira ne’ebé hasoru difikuldade iha finansiamentu hodi halo negósiu.
“Kooperativa rua ne’e ami halibur membru sira husi Oekusi ne’ebé hela iha Dili buka moris no balu estudante. Ida-ne’e hanesan eduka sira oinsá osan ne’ebé ita uza ne’e labele gasta hotu de’it, maibé rai hamutuk hodi ajuda ita bainhira hasoru susar ruma”, nia realsa.
Prezidente Kooperativa Kréditu Uniaun TABIHAE, Júlio Quelo, hateten kooperativa ne’e harii iha 2021 no daudaun iha ona membru hamutuk 54, ne’ebé kada fulan membru ida tau $10. “Daudaun ami iha ona kapitál hamutuk rihun $30-resin”, nia adianta.
Iha biban ne’e, nia parte mós husu ba SEKoop atu ba oin nafatin tulun sira ho formasaun kona-ba jestaun no jere osan nian, nune’e sira kuidadu no jere ho di’ak fundu ne’ebé iha.
Estrutura husi kooperativa kréditu rua ne’ebé simu pose hamutuk na’in-18, kompostu husi Prezidente, Vise-Prezidente, Sekretáriu, Tezoreira, Vogál no seluk tan.
Notísia relevante: SEKoop atribui sertifikadu ba formandu prosesamentu Bafo Kay Rala sai ai-han
Jornalista: Arminda Fonseca
Editora: Maria Auxiliadora
