LAUTEIN, 30 Outubru 2025 (TATOLI)—Ministru Obra Publika, Samuel Marçal, hateten kona-ba alargamentu estrada Ermera ne’ebé Governu atu reabilita konsege afeta mós komunidade balun ninia rai no plantasaun, maibé sira koopera lahusu indemnizasaun ba Governu importante sira bele asesu ba estrada.
“Bainhira sira presiza estrada entaun sira tenke koopera, maibé ha’u husu komunidade atu pasiensia uitoan tanba prosesu la’o hela, fiar katak tempu badak sira sei halo ona desizaun. Ha’u hein hela prosesu ne’e iha CNA, tanba ohin sira finaliza ona relatóriu finál, nune’e iha tempu badak Banku Mundiál bele fó rezultadu ne’ebé di’ak,” Ministru Samuel informa ba jornalista sira iha ámbitu lansamentu fatuk dahulu ba reabilitasaun estrada iha suku Com, postu Lautein, munisípiu Lautein, ohin.
Nia dehan, prosesu diálogu ne’e hala’o tiha ona entre Governu ho komunidade sira iha fulan hirak liubá, komunidade koopera atu loke espasu estrada afeta ba sira-nia plantasaun ruma, maibé sira mós hein hela dezenvolvimentu infraestrutura bázika ba sira-nia rai.
Prezidente Autoridade Munisípiu Ermera, José Martinho dos Santos Soares, hateten kooperasaun entre komunidade ho Governu atu loke espasu estrada iha Ermera ne’e ami halo diálogu kle’ur ona iha kedas fulan-Fevereiru 2025 ne’e sensibiliza husi ekipa konjunta to’o iha suku no aldeia sira-ne’ebé afeta ba alargamentu estrada.
Nia dehan, husi konsultasaun ne’e komunidade kolabora tebes no prontu simu projetu alargamentu estrada maske iha konsekuénsia balun ba sira-nia rai no plantasaun tanba importante liu ba sira atu asesu estrada.
“Diálogu ne’e halo diretamente husi Primeiru-Ministru, Kay Rala Xanana Gusmão inklui Ministru Obra Públika, Samuel Marçal, no komunidade mós koopera importante projetu ne’e tenke la’o ba oin no alargamentu estrada metru tolu ne’e komunidade la ejije buat ida ka laiha indemnizasaun,” nia dehan.
Jornalista : Alexandra da Costa
Editór : Cancio Ximenes
