VIKEKE, 07 Novembru 2025 (TATOLI)—Xefe Suku Builó, Postu Administrativu Ossú, Munisípiu Vikeke, Helio Ximenes de Ferreira, husu Ministériu Solidariedade Sosiál no Inkluzaun (MSSI) no Prezidente Autoridade Munisípiu (PAM) Vikeke hodi muda matadalan kona-ba apoia kaixaun ba família vulneravel sira, tanba matadalan la autoriza karreta funerária tula kaixaun mamuk.
“Foin lalais ne’e ami-nia família vulneravel ida mate sira bá husu Diresaun Asaun Sosiál Munisípiu Vikeke, atu fó apoia kaixaun maibé família vulneravel sira mak tenke buka karreta seluk hafoin tula kaixaun, tanba parte asaun sosail dehan matadalan la autoriza karreta funerária tula kaixaun mamuk,” Helio Ximenes de Ferreira ba TATOLI iha Postu Ossú, Sesta ne’e.
Xefe Suku Builó ne’e haktuir, hatene ona katak sira-ne’e vulneravel mak ba husu apoiu maibé fó tiha apoiu sira bá aluger tan ema nia karreta hafoin tula kaixaun.
“Ha’u sente ida-ne’e difikulta ita-nia família vulneravel sira tanba sira kbiit laiha mak husu ajuda. Loloos ne’e ita tenke buka alternativu ida di’ak ba ita-nia família vulneravel sira. Pelumenus kaixaun ne’e tula ba ambulánsia mak lori ba área rurál hodi ajuda ita-nia komunidade,” nia akresenta.
Tanba ne’e, nia solisita MSSI no PAM Vikeke hodi haree asuntu apoiu sosiál sira-ne’e tanba povu presiza ajuda kaixaun, fasilita tula ho karreta funerária to’o mate uma.
Tuir Helio katak sistema ida-ne’e mak la muda, bá-oin sei kontinua difikulta família vulneravel sira-ne’ebé hela iha área rurál ne’ebá.
Jornalista: Vitorino Lopes da Costa
Editór: Xisto Freitas da Piedade
