DILI, 11 Novembru 2025 (TATOLI) – Deputada husi bankada Frente Revolusionária Timor-Leste Independente (FRETILIN), Lídia Norberta, louva prezensa Kontinjente Forsa Tarrefa Konjunta hodi halo misaun umanitária ba povu Filipina relasiona ho dezastre naturál Tufaun ne’ebé akontese foin lalais hodi rezulta ema barak sofre.
Nia dehan prezensa dahuluk husi Forsa Armada hala’o misaun ne’e hatudu vizibilidade país nian hanesan membru Asosiasaun Nasaun Sudeste Aziátiku (ASEAN, sigla inglés) ne’ebé nakonu ho solidariedade.
“Liuhusi ita-nia aparelu sira ne’e, hodi fó liután imajen boot mai ita-nia rai, hanoin ida-ne’e di’ak. Ami apoiu ida-ne’e, tenke ba oin nafatin fó vizibilidade”, nia hato’o liuhusi reuniaun plenária Parlamentu, ohin.
Parlamentu Nasionál liuhusi reuniaun plenária, ohin, aprova mós votu pezár no solidariedade ba povu no Estadu Filipina no Vietname ne’ebé hasoru dezastre naturál Tufaun.
Governu liuhusi Ministru Defeza Kontra Almirante Donaciano do Rosário da Costa Gomes ‘Pedro Klamar Fuik’ no Xefe Estadu Maiór-Jenerál Forsa Armada, Domingos Raul Rate Laek, tersa ne’e, husik Kontijente Forsa Tarrefa Konjunta na’in-150, kompostu husi membru Falintil-Forsa Defeza Timor-Leste (F-FDTL) 120, Autoridade Protesaun Sívil-Diresaun Bombeiru na’in-20, Serbisu Saúde na’in-neen no Institutu Jestaun Ekipamentu Dezenvolvimentu Infraestrutura, Institutu Públiku (IGIADI, I.P), reprezenta husi ema na’in-haat, ne’ebé sei dezloka ba Filipina iha loron 12 Novembru ne’e.
Lembra katak, Tufaun, eventu intensu, udan boot, inundasaun devastadór no deslizamentu rai, ne’ebé foin akontese rezulta iha trajédia ema lakon vida 100-resin, rejista vítima lubun lakon, kanek no dezalojadu no estragu hela fatin ho seluk tan.
Notísia relevante: https://tatoli.tl/2025/11/11/governu-despede-kontijente-nain-150-fo-asistensia-umanitaria-iha-filipina/
Jornalista: Nelson de Sousa
Editora: Maria Auxiliadora
