BOBONARU, 13 Novembru 2024 (TATOLI) – Autoridade Inspesaun no Fiskalizasaun ba Atividade Ekonómika, Sanitária no Alimentár (AIFAESA) no Polísia Nasionál Timor-Leste (PNTL) eskuadra postu administrativu Balibó, munisípiu Bobonaru, lansa atividade auto-stop iha suku Batugadé hodi halo inspesaun ba kamioneta sira ne’ebé tula sasán importadu husi Indonézia no nasaun seluk.
Inspetora-Jerál AIFAESA, Odete Viegas, esplika katak operasaun ne’e hala’o tuir dekretu-lei númeru 43, ne’ebé ho objetivu mak atu proteje konsumidór sira-nia direitu ba ai-han ne’ebé seguru no la fó perigu ba saúde públika.
Nia hatutan katak iha kazu balu uluk, produtu ai-han lubuk ida mak hetan estragu no laiha lisensa distribuisaun. Tanba ne’e, AIFAESA hametin hela koordenasaun entre ajénsia sira hodi garante katak kada produtu ne’ebé tama iha Timor-Leste tuir padraun Governu nian.
“Molok Natál no tinan foun, ami hala’o hela operasaun ne’e hodi garante katak sasán importadu hotu kompletu no válidu. Ami permite de’it sirkulasaun ba sasán sira ne’ebé iha lisensa ofisiál no seidauk liu nia prazu”, Odete hateten iha sede suku Batugadé.
Atividade ida-ne’e, tuir Odete Viegas, hanesan mós ho liña ministeriál sira hala’o ona hanesan husi parte PNTL, Kuarentena, Autoridade Aduaneira, Ministeriu Saúde no parseiru, hanesan Tane Konsumidór no sira seluk ne’ebé koordena serbisu atu proteje direitu konsumidór sira-nian.
Dirijente ne’e subliña katak AIFAESA la halo inspesaun ne’e diretamente iha Mota-Ain, tanba pontu entrada ne’e papél Autoridade Aduaneira, Kuarentena no Ministériu Saúde nian.
“Tinan kotuk ami halo koordenasaun sira dehan kuandu sai husi pontu entrada ita bele halo atuasaun. AIFAESA nia knaar mak halo inspesaun ba restaurante, loja, fatin indústria, atrasaun turístika, pontu entrada, no transporta sasán husi nasaun seluk mai Timor-Leste”, nia esplika.
Administradór Postu Administrativu Balibó, Casemiro Soares, konsidera atividade ida-ne’e krusiál atu proteje públiku husi sirkulasaun sasán sira ne’ebé perigozu ka kaduka ona.
“Ami apoiu tomak AIFAESA nia atividade tanba sira ajuda Alfándega no Kuarentena kontrola sasán sira ne’ebé tama. Dalaruma produtu bandu sira borus liu bá Dili, ezemplu ami iha Balibó de’it la fa’an sigaru stiker Indonézia nian, más iha Dili kioke sira ne’e fa’an barak loos. Ita lahatene ida-ne’e falla iha ne’ebé? Entaun, ho AIFAESA nia prezensa iha fronteira bele halo inspesaun ne’ebé rigoroza no seguru liu”, nia dehan.
AIFAESA komprometidu atu kontinua ninia vijilánsia, liuliu iha pontu entrada fronteira sira, hanesan Batugadé no Balibó hodi asegura katak produtu hotu-hotu ne’ebé sirkula iha merkadu nasionál kumpre padraun seguransa ai-han ne’ebé Governu estabelese.
Notísia relevante: AIFAESA halo inspesaun ba estabelesimentu kosmetiku Balicom iha Timor Plaza
Jornalista: Sérgio da Cruz
Editora: Maria Auxiliadora
