DSMASA preparadu rezolve problema falta bee-moos iha llat-laun
BOBONARU, 05 Novembru 2025 (TATOLI) – Ekipa tékniku husi Diresaun Servisu Munisipál Água, Saneamentu no Ambiente (DSMASA) Autoridade Munisípiu Bobonaru daudaun ne’e preparadu atu tuun ba terrenu hodi rezolve problema falta bee-moos iha suku Ilat-laun, Postu Administrativu Bobonaru.
Diretór DSMASA Autoridade Munisípiu Bobonaru, Armindo da Costa Barros, konfirma, ekipa tékniku sira identifika komunidade llat-Laun ladun asesu bee-moos ho másimu tanba problema makina Bomba avaria inklui asesóriu balun hosi Sistema no devitu bee-menus.
Notisía relevante:Abitante Ilat-laun enfrenta problema falta bee-moos
“Ami SMASA inkontru ona ho komunidade llat-laun no na’i-liurai sira katak ami apoiu la 100%, maibé tuir kbiit de’it, ami apoia Bomba ida para bele fasilita sira asesu fali bee-mos ho di’ak” Nia informa ba Jornalista sira, iha edifísiu Autoridade Munisípiu Bobonaru, kinta ne’e
Ezekutivu ne’e haktuir, antes ne’e liuhusi enkontru komunidade sira no líder komunitária deside katak sira sei halo kontribuisaun hodi apoia sosa materiál balun hanesan asesóriu sistema bee-moos no seluktan, maibé to’o agora seidauk iha informasaun serteza, tanba parte SMASA seidauk bele halo intervenasaun ba sistema Bomba ne’ebé avaria.
Diretór ne’e sekunda, komunidade sira tenke halo kontribuisaun tanba bazeia dekretu lei númeru 04/2004 katak Sistema bee-mos rurais ne’e fó ona responsablidade ba komunidade atu jere no halo kontrolu liuhusi Grupu Maneja Fasilidade (GMF).
“Entaun ami la apoia 100%. Ami fasilita deit asisténsia tékniku, tanba se la’e ita-nia komunidade, ne’e toman ona, ho ida ne’e mak ami apoia balun, parte Grupu Maneja Fasilidade (GMF) mós apoia orsamentu husi komunidade, para sira bele sente Sistema bee-moos ne’e ita mak sai-nain duni,” nia dehan.
Enkuantu suku llat-laun iha aldeia tolu hanesan Tuneru, Ilat-Laun no Purugua ho nia totál populasaun 2,000-resin no xefe-família 400-resin.
Notísia relevante:IDN kanaliza bee-moos ba uma-kain 359 iha Ilat-laun Marobo
Jornalista: Sergio da Cruz
Editór: Rafael Ximenes de A. Belo
