DILI, 14 Novembru 2026 (TATOLI)-Parlamentu Nasionál aprova proposta adisionál $382.500 iha Orsamentu Jerál Estadu (OJE) tinan fiskál 2026 ba Sekretaria Estadu Komunikasaun Sosiál (SEKOMS).
Liuhusi diskusaun espesialidade, deputadu CNRT no PD aprezenta proposta ida hodi hasai $382.500 husi Dotasaun Jerál Estadu iha Programa Inkluzaun Sosiál hodi realoka ba SEKOMS nia Programa Dezenvolvimentu Setór Komunikasaun Sosiál iha atividade instala rede televizaun dijitál terrestre.
Deputadu CNRT, Gabriel Soares, nu’udar proponente apresia ho polítika Governu Dasiak iha 2025 hodi konstrui torre tolu iha Lautein, Ainaru, no Bobonaru ne’ebé hotu ona.
“Agora oinsá nia funsionamentu, nune’e liuhusi audiénsia ho SEKOMS, ami haree torre tolu nia tenke funsiona, maibé sei falta ekipamentu ba fatin tolu, nun’e ajuda kobertura RTTL iha rai-laran no rai-li’ur, ba funsionamentu ita-nia setór komunikasaun”, nia fundamenta iha debate espesialidade proposta OJE 2026 iha Parlamentu, ohin.
Sekretáriu Estadu Komunikasaun Sosiál, Expedito Dias Ximenes, agradese ba deputadu sira, ranab bele propoen atu iha ekipamentu ba torre tolu.
Nia dehan torre ninia istoria hahú kedas iha Oitavu Governu no bainhira tama ba mandatu Governu Dasiak ne’e nia konstrusaun foin atinje 10%. Tanba importánsia ba kobertura RTTL mak Governusente importante kontinua konstrusaun ne’e.
“Konstrusaun torre tolu, ne’ebé iha Lospalos [Altu Laline], Ainaru [Fleixa], Bobonaru [Tapo], hahú iha tinan 2022, tanba iha momentu konstrusaun ne’e ba de’it empreza ida de’it. Nia tenke halo konstrusaun iha fatin tolu ne’ebé dook, nune’e la’o kle’ur, foin ramata iha 2025”, dehan.
Atu torre ne’e funsiona ho di’ak, presiza instala ho ekipamentu dijitál, liuliu uza hodi alarga kobertura RTTL nian. “Tanba ne’e, ami haree presiza duni ekipamentu, apoiu ho proposta ne’e”, hateten.
Primeiru-Ministru, Xanana Gusmão, hateten Governu aseita la’ós tanba aumenta tetu, maibé tanba lei revogasaun pensaun vitalísia aprova iha fulan kotuk, nune’e kona-ba pensaun vitalísia ba eis-titulár ne’ebe prevee millaun $5 iha hela proposta OJE 2026 sei la uza maka iha proposta lubun hamutuk hatama iha millaun $5 hodi osan ne’ebé sei la uza realoka ba proposta sira ne’e.
Nune’e, proposta aumenta osan ba SEKOMS aprova ho votasaun a favór 42, kontra tolu, abstensaun 17.
Proposta OJE 2026 montante inisiál ba SEKOMS hamutuk $5.594.454 ho proposta ne’ebé pasa sei iha aumentu verba.
Jornalista: Nelson de Sousa
Editora: Maria Auxiliadora
