DILI, 18 Novembru 2025 (TATOLI)–Vise-Primeiru-Ministru, Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay, hateten Governu prontu atu fasilita kolaborasaun negósiu entre Timor-Leste no Malázia.
Eventu ne’e ho kategoria internasionál ne’e hetan partisipasaun husi empreza Malázia nian hamutuk 19 ne’ebé mai husi setór oioin.
“Malázia, hanesan prezidente ASEAN nian iha tempu ne’ebá, hatudu kompromisu estraordináriu. Gabinete tomak no embaixadór Malázia nian serbisu maka’as ba susesu ne’e. Momentu ne’e sei sai hanesan legadu folin-boot ba ita ba nafatin,” Vise-Primeiru-Ministru Kalbuady hato’o pozisaun ne’e bainhira hato’o diskursu iha semináriu Misaun Aselerasaun Esportasaun ba Timor-Leste no Halo Negósiu ho Malázia, ne’ebé hala’o iha Otél Palm Spring Fatuhada, Dili, tersa ne’e.
Nia dehan, semináriu no misaun emprezariál hanesan oportunidade boot ida no susesu depende ba partisipasaun ativa Timor-Leste nian, ho prezensa empreza Malaia sira husi setór oioin inklui petróleu no gás, ai-han no hemu, TIC, konstrusaun, servisu profisionál, edukasaun no bioteknolojia.
Programa ne’e inklui semináriu sira, sesaun sira aprezentasaun produtu nian, enkontru negósiu ida-idak no espozisaun produtu nian. Objetivu husi programa ne’e mak atu loke oportunidade sira ba komérsiu, investimentu no partisipasaun negósiu entre empreza sira Malázia no Timor-Leste nian.
Kalbuadi Lay hateten, importánsia husi misaun ida-ne’e iha kontestu adezaun ba ASEAN.
“Hanesan membru plenu husi ASEAN, ami iha asesu ba merkadu ida-ne’ebé boot-liu, padraun sira-ne’ebé armonizadu no lojístika di’ak-liu, liuliu ho ami nia viziñu Malázia. Investimentu estranjeiru sira agora konfiante liu hodi mai iha Timor-Leste, liuliu iha setór sira infraestrutura nian, enerjia renovável sira no ekoturizmu nian,” nia esplika.
Kalbuadi promete katak, nu’udar Vise-Primeiru-Ministru no Ministru Koordenadór ba Asuntu Ekonómiku, Governu prontu atu apoia investidór nia nesesidade hotu.
“Se ita-boot hanesan negosiante ki’ik, médiu ka boot, favór kontaktu ha’u ka TradeInvest. Ami prontu atu ajuda no asegura susesu hosi misaun ida-ne’e,” nia dehan.
Jornalista : Hortencio Sanchez
Editór : Cancio Ximenes
