DILI, 18 Novembru 2025 (TATOLI)-Sekretáriu Estadu Komunikasaun Sosiál (SEKOMS), Expedito Dias Ximenes, aprezenta ba Parlamentu Nasionál esplikasaun ida kona-ba motivu ne’ebé halo konstrusaun edifísiu foun Rádiu Televizaun Timor-Leste, Empreza Públika (RTTL, E.P) paradu.
Governante ne’e afirma katak obra ne’e suspende hela tanba problema fundasaun terrenu iha Kaikoli, iha ne’ebé empreza Aulia Multi Sarana, husi Indonézia, nu’udar manán-na’in ba konkursu internasionál organizadu husi Programa Nasaun Unida ba Dezenvolvimentu (PNUD) ne’ebé durante fulan tolu la konsege garante fundasaun terrenu ne’ebé di’ak, tanba volume bee iha rai okos ne’ebé sai iha fatin konstrusaun obra.
Tuir esplikasaun husi Expedito Ximenes, projetu ne’e finansia husi Governu Japaun, ho orsamentu totál millaun $5.9, ne’ebé husi montante ne’e millaun $4.4 mak destina ba konstrusaun edifísiu ho andár haat ne’e no nia restante ba formasaun profisionál iha jornalizmu nian.
Jestaun ba fundu ne’e Ezekutivu japonés entrega diretamente ba PNUD ne’ebé iha responsabilidade kona-ba implementasaun projetu no Governu Timor-Leste halo de’it lansamentu ba primeira pedra no hein simu edifísiu ida-ne’e bainhira prontu.
Sekretáriu Estadu esplika katak tanba empreza hasoru difikuldade no halo proposta foun hodi husu ba PNUD atu aumenta tan millaun $3 hodi bele kontinua projetu ne’e. “Governu Japaun la aseita, nune’e nia [empreza] rezigna-an halo konstrusaun projetu ne’e”, Expedito responde ba preokupasaun deputadu opozisaun FRETILIN kona-ba konstrusaun edifísu paradu, iha ámbitu debate proposta Orsamentu Jerál Estadu (OJE) 2026 iha faze espesialidade iha Parlamentu, ohin.
Ho rezignasaun empreza ne’e maka PNUD halo relatóriu ba Governu Timor-Leste no inisia prosesu redezeñu ba projetu ne’e, ne’ebé sei lansa iha Dezembru, ho kompromisu katak konstrusaun ne’e sei konklui iha 2027.
Primeiru-Ministru, Xanana Gusmão, reforsa katak kestaun bee-nalihun tanba iha terrenu ne’ebá uluk, antes Indonézia tama iha lagoa boot. “Indonézia sira mai ne’e mak tau tan uma, problema mak iha estudu sira haree tiha, sukat rai atu tau ona, más problema hanesan mós maternidade ho andár lima ne’ebé halo iha Ospitál Nasionál Guido Valadares. Ita-nia rai iha ne’ebá mós bee barak, ne’ebé sira tenke aumenta fali kbiit husi ninia baze aliserse ne’e para tahan”, Xanana salienta.
Tanba ne’e, Xefe Governu dehan presiza tempu no la’ós ema mak lakohi konstrui, maibé tenke ke’e tan, nune’e empreza husu aumenta osan hodi halo tanba ne’e serbisu estra. “Más PNUD sira la simu ne’e mak agora temi redezeñu katak halo fali buat foun ida. Foin daudaun sira halo ne’e bee la maran, sira kuru sai bee nafatin hela de’it. Problema mak bee no rai iha Kaikoli”, nia esplika.
Notísia relevante: Japaun disponibiliza millaun $5,9 ba konstrusaun edifísiu RTTL, EP
Jornalista: Nelson de Sousa
Editora: Maria Auxiliadora
