DILI, 19 Novembru 2025 (TATOLI)–Tribunál Judisiál Primeira Instánsia Dili (TJPID), Kuarta ne’e, liuhusi Juíz José Gonçalves, deside aplika medida koasaun Aprezentasaun Períodika ba arguidu na’in-rua ho inisiál NdSP no JA, ne’ebé suspeitadu iha kazu foti subar telefone iha Jaco Store iha área Fatuhada, iha loron Domingu (02/11).
Iha interrogátoriu dahuluk, Ministériu Públiku (MP) promove arguidu sira ho krime Furtu Agravadu ne’ebé previstu no punidu iha artigu 259 husi Kódigu Penál Timor-Leste.
Autoridade Seguransa kaer NdSP no JA hodi aprezenta mai Tribunál hodi submete ba interrogatóriu dahuluk tanba iha ligasaun ho arguidu tolu ne’ebé molok ne’e Polísia kaer ona hodi hetan ona medida koasaun Prizaun Preventiva iha Prizaun Bekora.
Tribunál nia razaun aplika Aprezentasaun Períodika tanba durante iha prosesu interrogatóriu dahuluk, Tribunál haree laiha indísiu katak NdSP no JA envolve iha kazu ne’e.
Notísia relevante : PNTL halo identifikasaun ema na’in-ualu ne’ebé envolve grupu foti subar telefone
Defeza arguidu, Germano Guterres Ramos hateten, arguidu na’in-rua ne’ebé deskonfia suspeitadu ba krime foti subar telefone iha Jaco Store, durante iha interrogatoriu dahuluk sira nega faktus.
Nia hatutan, maski nune’e iha alegasaun, MP husu atu aplika medida Prizaun Preventiva.
“Husi defeza nian, husu atu aplika medida ne’ebé justu no k’maan, nune’e hafoin Tribunál rona tiha parte hotu, Tribunál deside aplika medida Aprezentasaun Períodika, kada fulan arguidu sira aprezenta-an dala-rua iha Postu Polísia ne’ebé besik,” nia akresenta.
Germano Guterres hatutan, ligasaun ho ida-ne’e, antes ne’e iha arguidu na’in-tolu tama ona iha Prizaun Preventiva.
Prosesu interrogatóriu dahuluk ne’e prezide husi Juíz José Gonçalves, MP reprezenta husi Prokuradór Adérito Pinto Tilman, arguidu hetan asisténsia legál husi Defensór Públiku Germano Guterres Ramos no Emílio Ribeiro.
Jornalista : Natalino Costa
Editora : Julia Chatarina
