DILI, 14 Abríl 2026 (TATOLI)—Vítima na’in-rua husi Aplikasaun Snapboost hato’o keixa ba Diresaun Nasionál Servisu Investigasaun Kriminál (DNSIK).
“Horisehik vítima na’in-rua mak hato’o keixa formál mai Polísia kona-ba kazu Aplikasaun Snapboost. Prosesu investigasaun la’o hela,” Diretór Nasionál Servisu Investigasaun Kriminál, Superintendente Xefe Polísia Joao Belo dos Reis, hato’o ba Jornalista sira iha ninia knaar fatin, Kaikoli, Tersa ne’e.
Nia esplika, operadór hala’o atividade ne’e liuhusi meuis komunika ba malu depois husu kliente atu investe osan ho montante balun no ikus mai operadór promete katak sei hetan lukru dobru ou lukru barak iha tempu badak nia laran.
“Buat sira ne’e kuidadu tanba iha tempu modernu nia laran aplikasaun barak mak lohi malu, vítima mós barak ba asuntu ida-ne’e,” nia akresenta.
Vítima rejistadu ba atividade ne’e atije ona 200-resin iha territóriu tomak no balun hatama direta ba konta balun liuhusi ema.
“Entaun, ami sei bolu hotu sira ne’ebé envolve iha atividade ne’e atu halo deklarasaun, tanba ita konsidera buat ne’e la rejistu iha play store, laiha lisensa, depois simu ema-nia osan paradeiru la hatene, laiha feedback ba ema-nia na’in bele konsidera prosesu investigasaun mak sei determina,” nia relata.
Vítima sira hatama osan ho montante oinoin, balun $30, $35 to’o $2.000.
“Ita sei buka hotu no sente ofendidu bainhira hato’o keixa ba ita, ita sei halo prosesu. Ita buka tuir hela autór sira, ita mós buka referénsia balun husi nasaun ba prosesu investigasaun ida-ne’e ba fortifika prosesu. Tanba aplikasaun ne’e la rejista iha Play Store no laiha lisensa ne’ebé rejistu hanesan atividade komersiál,” nia tenik.
Notísia relevante : PAM Manufahi klarifika kona-ba identifikasaun irregularidade ba programa Merenda Eskolár
Diretór dehan, Polísia rasik la konsidera kazu ne’e hanesan fraglante delitu tanba bainhira foto tiha deklarasaun husi vítima ka ofendida sira-nia deklarasaun haruka sira fila kedan.
“Ita nafatin prosesa kazu ne’e ba oin hodi submete ba Ministeriu Públiku ,” nia tenik.
DNSIK kontinua buka vítima seluk ne’ebé sente lakon ba rikusoin ka osan ba asaun ne’e atu hato’o keixa.
“Oportunidade ida-ne’e mós Polisia Nasionál Timor-Leste avizu ba públiku, inan no aman sira iha munisípiu, iha postu no iha suku sira, katak labele fiar arbiru publikasaun informasaun ou ema ruma fó hatene ita iha relasaun ba investimentu osan tenke haree didi’ak informasaun molok hola parte iha atividade investimentu,” nia katak.
Autoridade Seguransa buka informasaun no entidade ne’ebé mak iha ligasaun ho kazu ne’e hodi hakle’an.
“Ami check aplikasan ne’ebé mak sira uza, katak la rejistu iha play store, aplikasaun ne’e ilegál, entaun Polísia Nasionál Timor-Leste apela nafatin husu ba inan-aman sira, karik sente sai vítima ba asaun ida-ne’e bele mai relata informasaun iha Polísia hodi avizu nafatin labele fiar ema ruma ne’ebé mai hato’o mensajen ba relasaun investimentu osan la liuhusi banku atu kuidadu didi’ak no labele fiar arbiru,” nia fó hanoin.
Jornalista : Natalino Costa
Editora : Julia Chatarina
