VIKEKE, 25 Novembru 2025 (TATOLI)—Autoridade Munisípiu Vikeke realiza espozisaun produtu lokál ba komunidade hodi festeja Loron Proklamasaun RDTL ba da-50 (28 Novembru 1975-28 Novembru 2025).
Iha abertura espozisaun ne’e, Prezidente Autoridade Munisípiu Vikeke, Francisco C. S de Gonzaga Soares, haktuir espozisaun ne’e Munisípiu Vikeke realiza hodi festeja komemora loron 28 Novembru nune’e lembra filafali tinan 50 liubá.
“Espozisaun ne’e la’o durante kalan haat (4). Labele provoka malu no tuda malu iha espozisaun. Iha tinan rua bá kotuk ita realiza atividade sira kapaa’s tanba iha kooperasaun entre autoridade seguransa sira no komunidde,” Francisco hateten iha abertura espozisaun, iha Postu Vikeke Vila, Tersa ne’e.
PAM Vikeke apresia ba komisaun organizadora ne’ebé hatudu ona sira-nia kapasidade hodi organiza atividade ba komemorasaun 28 Novembru ba tinan ida-ne’e.
“Ohin ita haree atividade espozisaun la’o ho kapa’as no organizadu. Ita espera bá-oin sei di’ak liután. Nune’e mós husu abitante sira atu partisipa serimónia isár bandeira 28 Novembru hodi hanoin hikas tinan 50 liubá ita-nia eroi lubuk ida mak fó ona sira-nia vida ba ukun rasik aan,” nia hato’o.
Iha fatin hanesan, Komandante Polísia Nasionál Timor-Leste (PNTL) Munisípiu Vikeke, Superintendente Polísia António Rego Fernandes, husu abitante sira tenke asegura espozisaun tanba númeru membru PNTL limitadu. Tan ne’e, presiza kontribuisaun parte komunidade hodi fó seguransa ba espozisaun.
Iha biban ne’e, Prezidente Komisaun Organizadora ba Komemorasaun 28 Novembru, Fernando Soares, haktuir selebrasaun 28 Novembru sai hanesan festa povu, festa inan-aman nian nune’e ba selebrasaun ne’e realiza atividade hanesan espozisaun produtu lokál ho totál stand hamutuk 35 kompostu husi ekipa Ministériu Agrikultura, Peska, Pekuária no Floresta (MAPPF) nasionál no komunidade Vikeke, jogu tradisionál hanesan kukuru hamutuk haat, manu futu no rolet ida.
Lembra fali katak selebrasaun Loron Proklamasaun 28 Novembru ba tinan ne’e autoridade Munisípiu Vikeke aloka orsamentu ba komisaun hamutuk rihun $20. Husi orsamentu ne’e aloka ba postu hamutuk $7.500 no kada postu sei hetan $1.500 no koloka ba komisaun isár bandeira iha munisípiu hamutuk $12.500.
Tuir observasaun TATOLI, I.P. nota katak abertura espozisaun produtu lokál hahú tuku 07:51, iha Postu Vikeke Vila ne’ebé la’o hakmatek.
Iha serimónia abertura espozisaun ne’e partisipa husi autoridade lokál, veteranu Munisípiu Vikeke, funsionáriu, estudante no hetan partisipa másima husi abitante Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
