DILI, 25 Novembru 2025 (TATOLI)—Sekretáriu Estadu Igualdade (SEI), Elvina Sousa Carvalho informa Sekretaria Estadu Igualdade ho nia parseiru sira implementa pilár tolu kompostu husi prevensaun, provizaun servisu no pilár terseiru mak asisténsia legál, hodi kombate Planu Asaun Nasionál Violénsia Bazeia ba Jéneru.
“Kada sosiedade sivíl ka parseiru iha responsabilidade ba prevensaun hodi halo advokasia no hasa’e konxiénsia ema-nian,” Elvina dehan ba jornalista sira iha Hera, Tersa ne’e.
Nia dehan provizaun servisu katak bainhira iha vítima ruma, sosiedade sivíl ida mak fó provídensia servisu no fó asisténsia ba vítima sira.
“No mós iha fali pilár asesu ba justisa mak provídensia no halo asisténsia legál hanesan advogada para akompaña iha prosesu ka fó konseling legál ruma para bele hasoru problema ne’e. Ne’ebé, ha’u hanoin Sekretaria Estadu Igualdade la’ós servisu mesak maibé hamutuk ho parseiru no liña minsiteriál sira hotu atubele proteje feto maluk sira liuliu labarik sira liuhusi kualker tipu violénsia hasoru feto no labarik feto,” nia esplika.
Nia esplika Sekretaria Estadu Igualdade labele dehan susesu tanba bainhira iha tiha susesu ne’e vítima barak, maibé atu hateten de’it vítima feto ka mane komesa iha ona konxiénsia atubele ko’alia sai.
Tuir dadus husi Fatin Seguru Formosa no fatin Seguru Ospitál Referrál Eduardo Ximenes Baucau iha tinan ida rejistu pasiente Violénsia Bazeia ba Jéneru hamutuk 200-resin kompostu husi Fatin Seguru Formosa 176 no Fatin Seguru Baukau 30 tanba Sekretaria Estadu Igualdade konsidera komunidade iha ona konxiénsia atu ko’alia sai kona-ba violénsia bazeia ba jéneru iha Timor-Leste.
Jornalista: Osória Marques
Editór: Xisto Freitas da Piedade
