DILI, 10 Dezembru 2025 (TATOLI)—Servisu Saúde Munisipiu Likisá daudaun ne’e hahú halo ona promosaun no edukasaun saúde ba komunidade no fahe ona ai-moruk Abate atu prevene moras dengue.
“Servisu Saúde Munisípiu Liquiça halo prevensaun kona-ba dengue tanba hetan orientasaun husi Ministériu Saúde atu fahe ai-moruk abate ba komunidade, atu bele prevene moras dengue,” Luís Manuel hateten ba Agência Tatoli liuhusi telefónika, ohin.
Nia afirma, Servisu Saúde Likisá hahú halo promosaun saúde tama-sai bairru hodi aviza ba komunidade atu halo limpeza iha uma hun, no ida-ne’e hanesan prevensaun dengue no fahe abate ba uma kain sira no pesoal saude tau direita ai-moruk abate ba tanki ka bidon ne’ebé mak komunidade iha.
“Hahú husi Janeiru to’o Outubru 2025 ne’e, Servisu Saúde Munisípiu Likisá rejistu pasiente dengue hamutuk 234, ne’ebé kompostu husi mane hamutuk 109 no feto hamutuk 125. Husi pasiente ne’e, ema na’in-tolu mak mate,” nia informa.
Nia dehan, pasiente na’in-tolu (3) ne’ebé mak mate ne’e mai husi Postu Administrativu rua mak pasiente ema na’in-ida (1) husi Postu Administrativu Bazartete no pasiente na’in-rua (2) ne’e husi Postu Administrativu Maubara, Muniípiu Likisá.
Jornalista : Felicidade Ximenes
Editór : Cancio Ximenes
