BOBONARU, 12 Dezembru 2025 (TATOLI)-Diresaun Servisu Munisipál Obra Públika (DSMOP) munisípiu Bobonaru submete ona pedidu ba Ministeriu Obra Públika (MOP) atu halo normalizasaun emerjénsia ba estrada iha aldeia Taimea, suku Malilait no Lourba, iha postu administrativu Bobonaru liga bá Atsabe-Ermera no Zumalai-Kovalima, ne’ebé hetan estragu tanba kauza husi dezastre naturál.
Diretór Servisu Munisipál Obra Públika Bobonaru, Marcelino Godinho, konfirma katak pedidu ne’e submete hafoin ekipa téknika sira halolevantamentu dadus iha terrenu.
Nia dehan DSMOP Bobonaru labele responde tanba laiha orsamentu no ekipamentu atu halo intervensaun. “Ita halo ona proposta ba iha Ministériu Obra Públika, nune’e bele halo intervensaun iha tempu badak nia laran”, nia informa ba Tatoli, iha Maliana, sesta ne’e,
Notísia relevante: Estrada ligasaun Bobonaru-Zumalai no Atsabe ameasada kotu
Dirijente ne’e subliña katak tékniku DSMOP identifika estrada ne’e hetan estragus kauza husi erozasaun no presiza duni MOP nia intervensaun. “Estrada gruta bá Oe-leu to’o bá Lourba sira ne’e ninia kondisaun la di’ak, sempre akontese rai-halai, provoka inundasaun afeta ba komunidade. Tanba ne’e, rekomenda ba ministeriu atu kontrata empreza ida standbye bainhira akontese rai-halai bele halo intervensaun”, katak.
Komunidade Bobonaru, Anselmo de Jesus, sujere ba MOP atu responde imediata molok akontese tan udan. “Agora hela de’it ona karreta ida nia fatin, tanba estrada kraik ne’e monu hotu. Se la rezolve lalais, udan mai ne’e monu hotu, movimentu Bobonaru, Ermera ho Kovalima paradu totál, tanba laiha tan dalan seluk”, nia dehan.
Nia mós husu ba MOP atu aselera prosesu projetu reablitasaun estrada husi Oe-Leu ba to’o Atsabe.
Anselmo relata katak daudaun ne’e movimentasaun transporte sira kontinua la’o normál.
DSMOP aprezenta proposta harii muru iha mota Osola
DSMOP aprezenta mós proposta ba Ministériu Obra Públika atu harii muru protesaun iha mota Osola ne’ebé lokaliza iha aldeia Mude, suku Meligu, postu administrativu Kailaku. Proposta ne’e mai husi Administradór Postu Administrativu Kailaku, Rudolfo da Cruz.
Diretór SMOP Autoridade Bobonaru, Marcelino Godinho, dehan kondisaun mota ne’ebé nakonu beibeik ne’e hamosu preokupasaun maka’as ba komunidade. “Bee kontinua sa’e no komunidade sira iha ne’ebá sente la seguru. Tanba ne’e maka ami hato’o proposta ba Ministériu Obra Públika”, dehan.
Aleinde ne’e, Autoridade Munisípiu Bobonaru mós hato’o proposta atu normaliza mota balun iha postu Kailaku. “Ami kontinua akompaña, enkuantu kompañia sira sei iha hela prosesu tender, no ami hein rezultadu”, dehan.
Projetu normalizasaun mota ne’e atu hamenus poténsia ba inundasaun no proteje área rezidensiál sira ne’ebé iha ona risku boot durante tempu udan.
Lembra katak, iha loron 10/12 ne’e akontese inundasaun, ne’ebé afeta ba uma-kain neen iha aldeia Mude, suku Meligo no danifika plantasaun hafoin akontese udan-boot iha tuku 14h00.
Notísia relevante: Komunidade hein intervensaun Governu hadi’a estrada Maliana-Bobonaru
Jornalista: Sergio da Cruz
Editora: Maria Auxiliadora
