DILI, 12 Dezembru 2025 (TATOLI)–Governu liuhosi Ministériu Asuntu Kombatente Libertasaun Nasionál (MAKLN), hamutuk ho Konsellu Kombatente Libertasaun Nasionál (CCLN-sigla portugeza), Sesta ne’e, haloot ona restu mortál hamutuk 50 iha Jardin Eroi Likisá.
“Ohin 12 Dezembru, ita finaliza seremónia fúnebre no sipultamentu ba restu mortál hamutuk 50,” Sekretáriu Estadu Veteranu, César dos Santos da Silva “Merak”, dehan iha serimónia fúnebre restu mortál, ne’ebé TATOLI asesu.
Governante ne’e haktuir katak iha 2025, Ministériu Asuntu Kombatente Libertasaun Nasionál (MAKLN) hamutuk ho CCLN realiza seremónia fúnebre iha munisípiu hanesan Lautein iha 24 Outubru 2025 ho restu mortál hamutuk 57, Munisípiu Manatutu iha 18 Novembru 2025 ho restu mortál hamutuk 103.
Tuir nia katak iha 2026 planu realiza serimónia fúnebre restu mortál iha Munisípiu Ermera 755, Ainaru 2.800, Manatutu iha Postu Administrativu Natarbora hamutuk 1.600 to’o 1800.
Nia dehan bá previzaun ida-ne’e, MAKLN hamutuk ho CCLN hanoin ona atu forma ekipa Komisaun Eventuál ida, hodi halo preparasaun ba programa referidu, no MAKLN ho CCLN sei haree, estuda, forma métodu no mekanizmu hodi jere programa ida-ne’e, tanba munisípiu tolu mai ho númeru restu mortál ne’ebé mak boot tebetebes.
Iha fatin hanesan, Tenente Jenerál Tito Cristóvão da Costa “Lere Anan Timur”, sente triste tanba sei hanoin família sira-ne’ebé oras ne’e lakon sira-nia oan, sira-nia família, no sira-nia parente durante rezisténsia iha luta ba libertasaun nasionál rai ida-ne’e nian.
“Ita nu’udár ema, sein dúvida, ne’ebé ita sente falta bainhira ita-nia maluk ida laiha ita-nia sorin. Depoiz tinan 50, ita haree bá família sira-ne’ebé lakon nia oan, ninia la’en, ninia família, nia parente, sei tanis. Só, dalaruma, aban-bainrua ita-nia oan, bei-oan sira maka keta bá tau de’it ai-funan karik,” Lere Anan Timur hateten iha nia diskursu.
“Más ita, pore-zemplu, ohin, ita entrega bandeira ne’e simbóliku, hanesan reprezenta ninia maluk, ninia oan, ninia aman, ninia alin, ninia família, ninia parente ninia isin, sira rei, sira tanis. Ba sira-ne’ebé família la lakon ba funu, basa-liman, ho hamnasa, ho kontente,” Lere Anan Timur hateten.
Maibé, Eis FALINTIL no Komandante Rejiaun Ponta-Leste ne’e dehan, sira-ne’ebé mak lakon sira-nia família ba rai-doben ida-ne’e, atu sai nasaun soberanu no independente, sira basa-liman, maibé hafalun ho sira-nia mata-been, ho sira nia fuan-kanek.
Asesór Prinsipál Xefe Estadu RDTL ne’e haktuir, “Hanesan uluk, no dalaruma imi mós rona, jornalista sira husu Prezidente José Ramos-Horta ninia inan. Ita ohin loron ita ukun-aan ona, Amaa kontente ka lae? Amaa dehan hanesan ne’e, ita bele ukun-aan, más ha’u la kontente tanba ha’u-nia oan mate hotu iha funu. Entaun, ida-ne’e mak ha’u hanoin katak ita la minimiza timoroan ida-rua ninia esforsu. Ita hotu-hotu nia kontribuisaun mak ohin ita hetan nasaun livre no soberanu”.
“Tanba ida-ne’e maka, hanoin katak, ita-nia maluk sira-ne’ebé ke agora ita haloot iha semitériu Likisá ida-ne’e, hanesan mós iha munisipiu sira seluk. Ita husu sira akompaña ita nafatin. Sira tau-matan ba ita nafatin. Sira mate ba nasaun ida-ne’e, ba rai ida-ne’e, objetivu maka dehan katak mate ka moris ukun-rasik aan,” LAT afirma.
Nune’e mós, Primeiru-Ministru ein-Ezersísiu atuál Segundu Vise-Primeiru, Ministru Koordenadór ba Assuntu Sosiál no Ministru Dezenvolvimentu Rurál no Abitasaun Komunitária, Mariano Sabino Lopes “Assanami” afirma polítika Governu no Estadu nian liuhosi MAKLN, halo koordenasaun ho CCLN, hodi kontinua dignifika restu mortál sira-ne’ebé maka balun sei iha fati-fatin ne’e, atubele haloot iha jardín eroi sira.
“Ita tau ita-nia eroi sira iha jardín eroi. Jardín, fatin ne’ebé maka atu buras nafatin. Buras ho valór, buras ho prinsípiu, buras ho responsabilidade ho hahalok nu’udár eroína, nu’udár eroi ba ita-nia nasaun. Valór ne’e sei buras, para kontinua hada’et ba jerasaun ba jerasaun rai ida-ne’e ninian,” Assanami dehan.
Jornalista: Osória Marques
Editór: Xisto Freitas da Piedade
