DILI, 18 Dezembru (TATOLI)-Prezidente Parlamentu Nasionál (PN), Maria Fernanda Lay, ohin halo audiénsia ho Embaixadora Austrália iha Timor-Leste, Caitlin Wilson, hodi hametin kooperasaun entre país rua.
Caitlin Wilson hateten objetivu husi sorumutu ne’e atu hametin nafatin relasaun entre Parlamentu Nasionál Timor-Leste no Parlamentu Austrália nian. Hodi aborda mós oportunidade membru deputadu husi Timor-Leste bele vizita Austrália no Austrália mai Timor-Leste.
Lembra katak iha fulan hirak liubá, deputadu Komisaun B ba Asuntu Negósiu Estranjeiru, Defeza no Seguransa no Komisaun D ba Asuntu Ekonomia no Dezenvolvimentu halo ona vizita bá Austrália hodi hasoru malu ho deputadu Parlamentu Austrália, aleinde halo estudu komparativu.
Durante enkontru, Prezidente Parlamentu no embaixadora ko’alia kona-ba área kooperasaun ne’ebé iha ona akordu.
Tuir planu, iha tinan 2026, sei organiza semináriu no halo diálogu hamutuk hodi haree serbisu ne’ebé presiza halo kolaborasaun hodi apoiu dezenvolvimentu Timor-Leste.
Jornalista: Nelson de Sousa
Editora: Maria Auxiliadora
