REINU UNIDU, 27 Dezembru 2025 (TATOLI) –East Timorese Association Peterborough – ETAP charity, halo selebrasaun Natál hodi fahe prezente ba labarik Timoroan 102 iha sidade Peterborough, Reinu Unidu (UK), iha loron-Segunda, 22 dezembru iha Community centre Unity Hall, Peterborough, Reinu Unidu.
Koordenadór ETAP, Celso Oliveira, hateten, onra ne’ebé bo’ot halibur hamutuk ba selebrasaun Natál Komunidade Timorense, espesialmente ba labarik sira iha Sidade Peterborough.
“Natál mak tempu espesiál ba Timorense hothotu. Maske ita la’o husik ita-niarain, momentu hanesan ida-ne’e hatudu ita bele kontinua mantein ita-nia kultura iha moris loron-loron. La’ós tanba prezente mak ita halibur hamutuk maibé liu-liu tanba fé, domin, dame, amizade no unidade,” refere komunikadu ida ba TATOLI, ohin.
Celso Oliveira agradese mós ema hotu ninia kolaborasaun. “Ha’u hakarak fó hikas agradesimentu ba ema hotu ne’ebé kontribui halo eventu ida-ne’e sai susesu, liu-liu ba voluntáriu sira ne’ebé serbisu maka’as tebes halo preparasaun hodi sosa prezente ba labarik sira, prepara ai-han no halo dekorasaun,” nia dehan.
“Ba membru komité ezekutivu ETAP nian, ba parseiru Waterloo Foundation ne’ebé apoiu prezente ba labarik sira no ba autoridade lokál ne’ebé kontinua suporte no servisu hamutuk ho ETAP, no ikusliu ba komunidade Timoroan hotu ne’ebé ohin halibur hamutuk hodi halo Timoroan nia kultura no amizadi forte liután,” nia akresenta.
Enkuantu, Reprezentante Embaixada RDTL London, Flaviano hateten katak “Momentu sira hanesan ne’e atu hametin ita Timoroan ninia unidade, amizade no haburas ita nia tradisaun. Natál lori dame no domin ba ita Timoroan hotu. Lori embaixada Timor-Leste nia naran hakarak hato’o boas festas Santu Natál no Tinan Foun nakonu ho susesu, saúde di’ak nafatin ba Timoroan hotu”.
Tuirmai, ETAP Youth Officer Remizia Carvalho, hateten labarik sira fila bá uma ho kontente.
“Ida-ne’e mak ami nu’udar organizadór gosta haree no hatene. Obrigadu ba parente sira-ninia feedback no labarik sira halo vídeo hodi hato’o apresiasaun no agradesimentu. Hotu-hotu merese ksolok hodi hatudu oferta Natál nune’e mós ba sira ne’ebé labele marka prezensa iha festa Natál ne’e tanba inan-aman serbisu, ETAP ninia voluntáriu lori ba entrega iha uma”.
Entretantu, marka prezensa iha festa Natál ida-ne’e ekipa ofisiál hosi Embaixada Timor-Leste iha London, líder Peterborough City Council Councillor Shabina Asad Qayyum, Polísia Cambridgeshire Constabulary, líder no membru komunidade sira.
Tinan ida-ne’e, pela primeira-vez ETAP charity fahe prezente ba labarik Timoroan hamutuk 102 ne’ebé tau naran iha lista ETAP nian.
Dezde 2021 ETAP rejistadu iha Charity Commission UK ho objetivu atu fó apoiu ba Timoroan iha sidade Peterborough no área sira seluk.
Oras ne’e daudaun, ETAP iha Sentru Apoiu ne’ebé ofisialmene loke segunda to’o sexta hodi fó atendimentu gratuitu ba sidadaun Timoroan ne’ebé hetan difikudade no prezisa tulun.
ETAP mós halo atividade desportiva no kulturál hodi prezerva Timor-Leste nia kultura no hametin nafatin amizade no unidade nasionál. ETAP iha Youth Club hodi halo programa ba foinsa’e Timoroan sira.
Hafoin Timor-Leste Ukun Rasik-An, Timoroan barak feto no mane deside buka moris no serbisu iha Reinu Unidu. Oras ne’e, ema Timoroan besik-rihun ida mak hela no servisu iha sidade Peterbroough. Inan no aman servisu maka’as iha fábrika no empreza oioin maibé oan sira frekuenta eskola bázika, kolejiu no universidade.
TATOLI
