DILI, 06 Janeiru 2026 (TATOLI)—Ministru Asuntu Kombatente Libertasaun Nasionál, Gil da Costa Monteiro “Oan-Soru”, hateten entre restu mortál ne’ebé rai iha Ospitál Nasionál Guido Valadares (HNGV-sigla portugeza), ekipa Ministériu Asuntu Kombatente Libertasaun Nasionál (MAKLN) identifika ona 14.
“Restu mortál iha-ne’ebá hamutuk 200-resin maibé ami identifika ona 14. Ne’ebé, ohin ha’u haruka ona ekipa MAKLN bá konfirma ruin 14 ne’e. Ne’ebé, ita-boot sira hein no ami sei fó-sai informasaun ba imi,” Oan-Soru dehan ba jornalista sira iha nia kna’ar fatin, Komoro, Tersa ne’e.
Iha parte seluk, Xefe Departamentu Forénsiku HNVG, Nilton Tilman hateten Departamentu Forénsiku preparadu no fatin ida-ne’e aleinde funsiona hanesan fatodojia ne’ebé mak hala’o nia servisu simu kadaver ka mate-isin normál no mate-isin la normál, ho buat sira ne’e hotu mak akumula restu mortál hamutuk atus rua no tolu iha-ne’e (HNGV).
“Se agora mak MAKLAN dehan iha ona planu ba ida-ne’e, Grasa a Deus, buat ida hein-hein mak mai ona. Ita espera katak planu ida-ne’e bele submente ba teste DNA. Ida-ne’e mak prosesu definitivu tanba ita iha ona referénsia foin daudaun ita halo teste ida iha 2024,” Nilton informa.
Nia haktuir restu mortál tau iha-ne’ebá (HNGV) komesa Timor ukun an no balun hahú kedas tinan 1999.
Jornalista: Osória Marques
Editór: Xisto Freitas da Piedade
