OEKUSI, 07 Janeiru 2026 (TATOLI) – Diretór Diresaun Rejionál Infraestrutura (DRI) Rejiaun Administrativa Espesiál Oekusi Ambeno (RAEOA), Remigío Nuno Sila, informa katak Autoridade RAEOA ho Ajénsia Dezenvolvimentu Nasionál, Institutu Públiku (ADN,I.P) hamutuk ho empreza PT.Waskita Karya iha konkordánsia legál atu aumenta projetu adiosionál kilometru haat ba projetu estrada hosi Tono ba Oésilo.
Remigío Nuno Sila subliña, desizaun koletiva tanba bazeia ba valór kontratu ba projetu estrada hosi Tono ba Oésilo boot liu, empreza Waskita Karya ezekuta projetu referidu ho distánsia kilometru 17 kompara ho nia verba millaun $33-resin.
Notísia relevante:Rogério Lobato preokupa projetu estrada Tono ba Oésilo gasta millaun 33-resin
Tanba ne’e, iha mandatu Prezidente Autoridade Sesante, Rogério Tiago Lobato, rekomenda presiza halo revizaun ba Bill of Quantity (BoQ) hodi aumenta projetu adisionál kilometru haat, hahú hosi Oésilo to’o mota Noél-Ekat inklui kontrusaun ponte iha mota Noél-Ekat.
“Grasa boot ida, tanba koordenasaun autoridade ho empreza Waskita Karya, iha mandatu autoridade sesante hamutuk ho DRI no ADN, ita selebra konkordansia legál ida kona-ba orsamentu ba projetu estrada husi Tono ba Oésilo nia valór boot kompara ho distánsia projetu badak, kilometru 17 de’it maibé nia osan millaun $33 kedas,” nia hateten iha Oekusi, ohin.
Entaun ho maneira ne’ebé Autoridade RAEOA hamutuk ho AND,I.P halo ho empreza Waskita Karya deside halo revizaun ba Bill of Qua
ntity (BoQ) oinsá atu kalkula ba nia orsamentu reál.
“Ne’ebé iha 2025, iha ona konkordánsia katak, projetu estrada ne’e sei halo ajustamentu ho adisionál kilometru haat hosi Oésilo sentru to’o mota Noél-Ekat inklui harii mós ponte iha Noél-Ekat, ne’ebé parte rua konkorda ona, maibé depois estrada ne’e ramata mak kontinua adisionál kilometru haat ne’e,” nia hateten.
Notísia relevante:Xanana observa projetu estrada Tono – Oésilo no rekomenda pontu rua ba Waskita
Diretór ne’e esplika, preokupasaun Autoridade RAEOA nian mak kona-ba padraun presu unitáriu no distánsia projetu, ne’ebé liuhusi ekipa tékniku hamutuk ho AND,I.P halo fiskalizasaun no verifikasaun aprezenta katak, kada kilometru ida gasta millaun $1-resin.
Ho situasaun ne’e mak ekipa tékniku halo verifikasaun no avaliasaun konsege deskobre buat sira-ne’e, maibé tanba empreza iha kontratu, entaun ita tenke koordena didi’ak, halo revizaun fila-fali ba BoQ, katak presiza aumenta kilometru haat, no konstrui ponte boot ida iha mota Noél-Ekat.
“Agradese boot tanba parte rua bele hetan konkordánsia legál ida, katak aumenta adisionál kilometru haat, ne’ebé projetu estrada Tono ba Oésilo agora daudaun nia progresu fíziku atinje ona 50%,” nia katak.
Notísia relevante:Primeiru-Ministru orienta autoridade RAEOA prepara dezeñu harii ponte iha mota Noel-Ekat
Entretantu, ho asuntu ne’e, Jornalista Ajénsia Tatoli,I.P tenta konfirma ho Jestór empreza iha edifisíu Waskita Karya, Ikhwan, lokaliza iha suku Naimeko maibé rejeita fó informasaun tanba okupadu ho serbisu seluk.
Rekorde fali katak, empreza Internasionál PT. Waskita Karya, ezekuta projetu estrada nasionál ne’e hahú husi eis-merkadu Tono, suku Cunha, sub-rejiaun Pante Makasar to’o fronteira Napan, suku Bobometo, sub-rejiaun Oésilo ho distánsia kilómetru 17, ezekuta ho valór kontratu millaun $33,915,000.00, orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian, ho durasaun servisu durante tinan rua.
Jornalista: Abílio Elo Nini
Editór: Rafael Ximenes de A. Belo
