DILI, 08 Janeiru 2026 (TATOLI)—Ministru Justisa, Sergio Hornai hasai ona desizaun hodi anula desizaun anteriór husi Vise-Ministru Fortelesimentu Institusionál, Paulo Remedios, ne’ebé autoriza kandidatu Advogadu Privadu na’in-neen ne’ebé la liu iha VI Formasaun Advogadu Privadu 2024 atu kontinua estájiu.
“Ha’u halo desizaun bazeia ba konviksaun, ne’ebé ha’u haree ba relátoriu husi Sentru Formasaun Jurídiku no judisiária, hatuur ha’u-nia desizaun metin atu fó kbiit ba Konsellu Pedagójika iha Sentru Formasaun atubele la’o ba oin,” Ministru hato’o ba Jornalista sira iha ninia knaar fatin, Kolmera, Kinta ne’e.
Aleinde ne’e, tuir relatóriu husi Konsellu ne’e katak kandidatu Advogadu Privadu husi VI Kursu Formasaun Advogadu Privadu 2024 sira ne’e la pasa ona iha faze selesaun.
“Sira la pasa ne’e pur volta ema lubuk mak la admitidu. Sira la satisfáz, sira iha razaun bele rekorre liuhusi dalan ne’ebé iha, tanba ita iha Estadu de Direitu,” nia akresenta.
Notísia relevante : MJ sei foti desizaun ba kandidatu Juíz la admitidu formasaun iha Portugal
Governante ne’e husu ba kandidatu Advogadu hirak ne’ebé la admitidu atu buka oportunidade atubele tuir fali formasaun seluk.
Antes ne’e, Vise-Ministru Fortelesimentu Institusionál, Paulo Remedios hasai despaisu ida iha Outubru 2025, hodi husu ba Sentru Formasaun Jurídiku no Judisiária hodi fó oportunidade filafali ba kandidatu Advogadu Privadu husi VI Formasaun Advogadu Privadu 2024 ne’ebé la admitu atu kontinua halo estájiu durante fulan-haat nu’udar Advogadu Privadu.
Jornalista : Natalino Costa
Editora : Julia Chatarina
