“Serbí ita-nia rai no serbí ita-nia povu atu forte liután”
OEKUSI, 28 Janeiru 2026 (TATOLI) – Autoridade Aduaneiru (AA) Alfándega, kuarta ne’e, komemora loron mundiál Alfándega ba dala-LXXIII no loron aniversáriu Alfándega Timor-Leste ba dala XXVI 28 Janeiru 1999 – 28 Janeiru 2026, selebra iha Rejiaun Administrativa Espesiál Oekusi Ambeno (RAEOA) ho tema ‘Hamutuk ita transforma Alfándega sai forte, reziliente no fasilitadora’.
Komisáriu Alfándega Timor-Leste, Joanico Pinto, fó sai istorikamente Alfándega eziste iha Timor-Leste iha 1999 dezde tempu ONU, ohin ultrapasa ona tinan barak. Tanba ne’e, iha nesesidade barak tebes, hodi fó difikuldade ba dirijente sira atu responde nesesidade públiku atu atua.
“Maibé to’o ohin ami sei hamriik no sente orgullu, tanba iha limitasaun no problema barak, maibé ohin ami konsege sobrevive no eziste hodi serbí ita-nia rai no serbí ita-nia povu atu forte liután,” Komisáriu Joanico Pinto hateten, liuhusi diskursu iha salaun Alfándega Oekusi, ohin.
Notísia relevante:Alfándega lansa sistema Asycuda World dijitaliza atendimentu iha fronteira Oekusi
Autoridade Alfándega ne’e, afirma katak, kna’ar prinsipál Alfándega iha pontu tolu atu presta ba Timor-Leste, primeiru hala’o serbisu seguransa atu kontrola movimentu ema no sasán sira tama no sai iha territóriu nasionál. Alfándega nia kna’ar mak atu asegura katak sasán sira-ne’ebé lei proibidu labele tama mai rai laran, “Ne’e funsaun ida husi serbisu seguransa nian”.
Pontu daruak, Alfándega mak entidade ida-ne’ebé halo koleksaun kobra taxa ka impostu ba Estadu. Pontu ikusliu mak atu asegura movimentu merkadória sira tenke la’o di’ak, nune’e bele fó konfiansa ba setór privadu sira tantu nasionál no internasionál, bele investe iha rai laran.
“Tan ne’e liuhusi aniversáriu ne’e, agradese ba kolaborasaun institusionál ne’ebé fó husi entidade governamentál sira hotu, ita ko’alia ba fronteira tuir padraun internasionál, iha instituisaun tolu, naturalmente sai hanesan pilár importante atu reprezenta Estadu nia dignidade, mak custum, migrasaun no quarentina, ne’e reprezenta ondra no previleju Estadu nian,” nia hateten.
Notísia relevante:Alfándega kapasita funsionáriu 72 iha Oekusi kona-ba sistema ASYCUDA World
Tuir nia, bainhira instituisaun Estadu tolu ne’e, hala’o funsaun ladi’ak, imajen nasaun nian mak sei monu, bainhira sira komete irregularidade afeta ba dignidade nasaun nian. Tanba ne’e, aleinde instituisaun tolu ne’e, kolaborasaun di’ak tebes entidade governamentál sira seluk.
“Tanba iha fronteira, iha reprezenta ajénsia governamentál barak, ne’ebé ita serbisu hamutuk ba interese Estadu no rai ba povu ida-ne’e,” nia orgullu.
Notísia relevante:Alfándega sei reativa ekipa konjunta halo operasaun ba importasaun tabaku ilísitu
Iha biban ne’e, Prezidente Autoridade RAEOA, Régio da Cruz Salu, kompromete serbisu hamutuk ho Ministériu Finansa hodi kontinua tau matan ba dezenvolvimentu institusionál atu fasilita serbisu Autoridade Aduaneiru nian iha fronteira.
“Dezenvolvimentu institusionál Autoridade Aduaneiru iha Oekusi, ami hakarak serbisu hamutuk nafatin ho Ministériu Finansa, nune’e ita-bele haree, ami-nia kompromisu hakarak abranje lalais free rade zone, hahú ho people to people ekonomia, ne’e mak importante, tanba ko’alia kona-ba sosiál market, ekonomia, nia forsa ne’e iha povu, entre nasaun viziñu atu promove ba ekonomia iha fronteira, no Alfándega fasilita ho regulamentu hodi la’o tuir, nune’e ita bele fó benefisíu ba nasaun rua ne’e,” nia katak.
Notísia relevante:Alfándega planu sosializa ba abitante Oésilo kona-ba utilizasaun postu integradu terrestre
Entretantu, iha 2025 reseita ne’ebé Alfándega arrekada durante tinan hamutuk millaun $120,850,308.46. Verba ne’e rekolla mai husi portu, aeroportu no fronteira Terrestre sira.
Jornalista: Abílio Elo Nini
Editór: Rafael Ximenes de A. Belo
