DILI, 30 Janeiru 2026 (TATOLI) – Komisaun C Parlamentu Nasionál, ne’ebé Trata Asuntu Finansa Públika, halo audiénsia públika ho Autoridade Rejiaun Espesiál Oekusi Ambenu (RAEOA) hodi diskute kona-ba relatóriu Kámara Konta kona-ba Konta Jerál Estadu 2024.
Prezidente Komisaun C, Cedelízia Faria dos Santos, hateten katak iha relatóriu Kámara Konta notifika iha diferensa iha númeru reseita RAEOA nian, inklui problema iha ezekusaun orsamentu husi Ministériu Finansa no kestaun kona-ba aviaun ZEESM.
“Prezidente [RAEOA] hateten sira hetan ona dokumentu [aviaun nian]. Ba oin sira bele haree. Ami mós rekomenda atu halo filafali operasaun hodi hatama mós reseita, maibé tenke haree mós ninia despeza, tanba antes ne’e ninia despeza rihun $150 kada fulan no ninia reseita rihun $5 de’it”, dehan.
Iha relatóriu RAEOA nian, osan Covid-19 seidauk fó fila ba kofre Estadu, ho montante kuaze rihun $400-resin. Autoridade justifika katak osan ne’e uza ba halo konstrusaun ospitál balun no bainhira ramata, restu sei fó filafali ba kofre. Relatóriu mós hatudu katak ezekusaun OJE 2024 ki’ik, no iha virement barak ne’ebé muda osan husi verba saláriu no vensimentu.
“[Tanba] iha mudansa iha lideransa troka ba-mai, entaun problema sira ne’e mosu. Espera ba oin bele mantein ida ne’ebé di’ak ona”, realsa.
Notísia relevante: https://tatoli.tl/2026/01/21/kamara-konta-aprezenta-konta-jeral-estadu-2024-ba-pn/
Prezidente RAEOA, Régio da Cruz, hateten katak parte autoridade halo klarifikasaun kona-ba iha diskrepánsia iha ezekusaun orsamentu, liuliu iha númeru sira, tanba iha erru tékniku, rekerimentu saláriu no vensimentu, diferensa saldu jerénsia, inklui utilizasaun fundu espesiál. Klarifikasaun sira ne’e mós hato’o ona iha resposta eskrita ho dadus.
Notísia relevante: https://tatoli.tl/2026/01/23/governu-komprometidu-atu-mellora-transparensia-orsamental/
Iha audiénsia ne’e, membru Parlamentu husu ba RAEOA atu kontinua investimentu hodi finaliza konstrusaun Ró Haksolok.
Notísia relevante: https://tatoli.tl/2025/10/11/fretilin-ninia-komentariu-ba-ro-haksolok-orsamentu-iha-hela-fundu-espesial-raeoa/
“Deputadu balun foti kona-ba Ró Haksolok, maibé sira [RAEOA] dehan katak, tanba prosesu ne’e tama ona ba tribunál, entaun autoridade sei labele halo buat ida, hein rezultadu tribunál sai mak sira bele halo medida ruma’’, Cedelízia Faria hateten.
Komisaun C preokupa, tanba tinan kotuk halo ona fiskalizasaun direta bá estaleiru no ró ne’e iha Portugál.
Notísia relevante: https://tatoli.tl/2025/11/28/mp-konstitui-ona-ema-nain-50-resin-sai-arguidu-ba-kazu-ro-haksolok/
Jornalista: Nelson de Sousa
Editora: Maria Auxiliadora
