KOVALIMA, 30 Janeiru 2026 ( TATOLI)- Ministériu Administrasaun Estatál (MAE), liuhusi Diretora Jerál Toponímia Organizasaun Urbana, Maria Odete Barros Florindo ho nia ekipa louva ho prestasaun servisu Autoridade Munisípiu Kovalima.
Razaun ekipa avaliadór louva servisu autoridade Kovalima tanba relasiona avalia kondisaun mínima liu husi vizita Servisu Munisipál Edukasaun, Saúde, Agrikultura, Programa Nasionál Dezemvolvimentu Suku (PNDS), Servisu Munisipál Obra Públiku, Planeamentu Munisipál Integradu Dezenvolvimentu (PMID), hodi haree direta progresu servisu durante ne’e la’o.
“Bazeia ami-nia observasaun munisípiu Kovalima utiliza orsamentu ho di’ak tanba iha poupansa orsamentu husi PDIM hodi halo konstrusaun Jardim. Ida-ne’e hatudu katak, hatene halo jestaun ba iha orsamentu, nune’e labele estraga,” Diretora Jerál hato’o apresiasaun iha salaun AMC, hafoin vizita servisu iha Kovalima, ohin.
Diretora Jerál husu ba Autoridade atu mellora di’ak liutan servisu hamutuk hodi rona malu no unidade mak bele forsa liutan hodi hadi’a Kovalima ho di’ak liutan.
“ Ami rezista rekomendasaun no idea hotu husi autoridade sira hodi relata ba Ministru Administrasaun Estatál hafoin ekipa sei elabora fila-fali hodi haree ba ninia kontinuasaun,” nia relata.
Durante prezensa ekipa avaliadór iha Kovalima hodi hala’o vizita ba Servisu Munisipál Edukasaun foku liu ba implementasaun programa menda eskolár, konsesaun eskolár hodi monitoriza ezekusaun orsamentu no kontinua ba monitoriza servisu Munisipál Saúde, Servisu Munisipál Agrikultura, implementasaun projetu PNDS,PDIM no Obra Publika.
Iha fatin hanesan, Prezidente Autoridade Munisípiu Kovalima, Miguel Armada Cardoso, dehan ho rezultadu avaliasaun prelimináriu identifika ona pontu frakeza balun nune’e ba futuru presiza hadia di’ak liu.
“Ami sei hadi’a liutan no halo preparasaun bainhira ekipa avaliadór kontinua avalia, ami hakarak mellora liutan ami-nia prestasaun servisu, haree ba rekursu umanu no rekursu naturál,” nia promete.
Bainhira implementa polítika podér lokál no desentralizasaun administrativa, nia dehan sei halo jestaun ho di’ak liu tanba Kovalima iha riku-soin hanesan Minarai, ne’e rasik sei jere husi Nasionál, seluk hanesan ai-kameli no sira seluk tan sai hanesan valór ekonómiku iha merkadu mundiál.
“Tanba ne’e mak fi’ar katak, ita nia unidu sempre la’o, hodi nune’e hadi’a diak liutan Kovalima,” nia dehan.
Governu sentrál fó kompeténsia mai munisípiu Kovalima iha pilár tolu mak hanesan pilár administrasaun, Finansa ho pilár patrimóniu no lojistika, maibé seidauk fó kompénsia ba munisipiu kona-bá polítika.
Notisia relevante:Kovalima kontinua halo preparasaun hodi hein Desentralizasaun Administrativa-Podér Lokál
Jornalista: Celestina Teles
Editór: Florencio Miranda Ximenes
