DILI, 02 Fevereiru 2026 (TATOLI)—Ekipa Emanuel Football Club (FC) dudu sees AD SLB hodi hakat bá meiu finál hafoin iha jogu ikus kualifikasaun Grupu A lolo Aitana FC ho skor 0-5 iha kompetisaun Tasa Liga Federasaun Futeból Timor-Leste (FFTL) 2025, ne’ebé hala’o iha Estádiu Munisipál Dili, Sesta (30/01/2026).
Ekipa Emanuel prodús golu lima hafoin iha parte dahuluk lidera ho skor 0-2 iha-ne’ebé enxe husi jogadór Paulo Godinho iha minutu 20 no Mario Quintão iha minutu 22.
Notísia relevante: Aitana promete sei la fó fatin ba Emanuel FC
Enkuantu, golu tolu seluk elementu Van Basten prodús iha parte daruak liuhusi jogadór sira hanesan Sandro Lima iha minutu 71, Angenuku Viegas minutu 81 no Palomito Ribeiro iha minutu 90.
Ho rezultadu jogu entre ekipa rua, loke oportunidade ba Emanuel FC atu hakat bá faze meiu finál hafoin lidera tabela klasifikasaun Grupu A ho produtividade golu lima (5) no rekolla pontu haat (4).
Ekipa rua seluk eliminadu kompostu husi AD SLB hafoin lakon golu rua ho Emanuel FC iha-ne’ebé totál produtividade golu (+/-) tolu, manan ida (1), impata ida (1), pontu haat, entretantu Aitana FC pontu 0 hafoin derrota rua no produtividade menus husi golu ualu.
Jornalista: Natalino Belo
Editór: Xisto Freitas da Piedade
