BAUKAU, 02 Fevereiru 2026 (TATOLI)—Serbisu Munisipál Saúde Baukau (SMSB) durante fulan-Janeiru tinan-ne’e rejista kazu dengue hamutuk na’in-43 ne’ebé maihusi Sentru Saúde hitu iha Munisípiu Baukau.
Xefe Departamentu Programa Saúde SMSB, Maria Cândida dos Reis esplika kazu hirak-ne’e rejista hafoin pasiente sira bá halo tratamentu iha sentru saúde ne’ebé maioria maihusi idade produtiva hanesan labarik idade tinan ida to’o tinan 15.
“Seidauk rezulta ema ruma lakon vida. Durante halo tratamentu iha sentru saúde maibé balun trsnsfere ba HoREX Baukau no bá Ospitál Nasionál Guido Valadares (HNGV-sigla portugeza) bainhira presiza halo tratamentu kontinuasaun,” Maria dos Reis hateten iha ninia kna’ar fatin, Tirilolo, Vila Antiga, Baukau, Segunda ne’e.
Notísia relevante: Pasiente dengue na’in-ualu halo tratamentu iha ospitál temporáriu Kuarentena Tasi-Tolu
Nia relata SMSB implementa programa dengue kategoriza ba área tolu hanesan saúde ambientál realiza atividade ba prevensaun, programa vizilánsia epidemolojia halo investigasaun ba kazu dengue ne’ebé akontese iha kada sentru saúde no programa prevensaun direta bá baze halo promosaun, fahe informasaun ba komunidade kona-ba maneira prevensaun sira.
SMSB implementa programa prevensaun hanesan fahe buletin inklui monta pamfleitu, loke informasaun kona-ba moras dengue liuhusi meiu komunikasaun iha sentru saúde sira no esplikasaun direta husi pesóal saúde sira iha postu no sentru saúde.
“Ami halo prevensaun uluk hanesan fahe abate antes udan monu rai no kontinua halo fumigasaun ba komunidade bainhira mosu ona kazu dengue,” Maria dos Reis subliña.
Entretantu, tuir dadus, totál kazu 43 ne’e kompostu feto 14 no mane 29 ne’ebé rejista iha sentru saúde hitu hanesan Baguia 1, Laga 1, Kelikai 2, Venilale 13, Vemasse 4, Ossokeli 11 no Uailili hamutuk kazu 11.
Jornalista: Natalino Belo
Editór: Xisto Freitas da Piedade
