DILI, 03 Fevereiru 2026 (TATOLI)—Primeiru Ministru, Kay Rala Xanana Gusmão, husu auttroiddade Bekora tenke kuidadu kampu Sport Training Center ka kontrola Sentru Desportivu Amizade Korea no Timor-Leste iha Bekora ne’e ho di’ak no bele utiliza ba tinan naruk.
Notísia Relevante: PM Xanana-KOICA inaugura Sentru Desportivu Amizade Korea-TL iha Becora
“Ami, ohin, la’o hale’u kampu hodi haree odamatan bara-barak, iha fatin balun moru badak, tanba ne’e husu ba ita-boot sira kontrola komunidade labele tama mai hodi estraga. Tanba ne’e aviza ba ita-boot sira-nia komunidade atu utiliza didi’ak kampu ne’e,” Xanana hateten.
Iha fatin hanesan, Xefe Suku Bekora, Antonio da Silva Soares, hateten nia parte sei fó orden ba xefe aldeia sira atu haree no kontrola ba kampu ida-ne’e, atu nune’e ema seluk labele estraga kampu referidu.
“Ohin, ami rona direta Primeiru-Ministru, Xanana Gusmão, fó orientasaun tanba ne’e ami sei halo kontrolu ba ida-ne’e, atu haree evita estraga husi ema seluk,” Antonio da Silva Soares hateten.
Jornalista : Felicidade Ximenes
Editór : Cancio Ximenes
