OEKUSI, 05 Fevereiru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Diresaun Rejionál Agrikultura, kuarta ne’e, apoia fini hare Membramo saka 900 kompleta kedas ho adubu orgániku Ako’y Magsasakang Organiku (AMO) hamutuk falun-315, hodi fasilita natar-na’in-175 iha natar Petun suku Cunha sub-rejiaun Pante Makasar.
Notísia relevante:Xanana Gusmão tulun agrikultór fornese bee ba natar Petun
Diretór Diresaun Rejionál Agrikultura Oekusi, José Oki, esplika katak objetivu husi distribuisaun fini hare Membramo ho adubu orgániku ne’e, atu tulun agrikultór sira, nu’udar motivasaun ida atu bele hasa’e produsaun.
“Imi-nia proposta ne’ebé antes ne’e hato’o mai agrikultura, ami konsidera tanba agora tempu halai natar, kanál irigasaun mós foin daudaun ita mai loke ona, tanba ne’e, fini ho abudu ne’e ami oferese ba ita-boot sira, utiliza tuir nesesidade natar nian, labele fa’an tutan, tanba adubu Governu mak sosa atu apoia ba agrikultór sira tantu natar no to’os. Ne’ebé, ha’u fiar katak ho apoia hirak-ne’e, bele motiva liután ita-boot sira nu’udar natar-na’in, ita-nia esperánsa tenke hasa’e produsaun liu-liu hare membramo, tanba Membramo nu’udar produtu identiku Oekusi nian,” nia hateten, iha aldeia Noeninen.
Notísia relevante:Agrikultór Cunha no Lalisuk iha Oé-Cusse hahú halai natar époka 2023
Iha biban ne’e, Jeka de Carvalho, nu’udar natar-na’in iha natar Petun, hato’o nia satisfasaun tanba ho apoiu fini no adubu bele tulun ona agrikultór sira-nia preokupasaun, tanba kada tinan agrikultór sira kuda hotu, hetan atakasaun maka’as husi peste.
“Ami agradese tebes tanba adubu ne’e ajuda ona ami, atu uza hodi rega ba hare sira, tanba ami-nia hare kuda hotu tiha hetan akatasaun husi peste lakataru, hare nia tahan sai kinur to’o namlaek. Ne’ebé, ita observa rasik balun hahú fera rai, atu prepara viveiru hodi kuda, tanba natar Petun nia tempu mak agora ne’e, sei kolleta iha fulan-Abríl to’o Maiu,” nia orgullu.
Notísia relevante:Barajen Tono benefísia natar ektare 1.717 iha Pante Makasar
Entretantu, natar Petun lokaliza iha aldeia Noeninen suku Cunha sub-rejiaun Pante Makasar ho totál ektare 42 envolve natar na’in-175.
Notísia relevante:Autoridade RAEOA sosa adubu orgániku AMO hodi hasa’e produsaun agríkola
Jornalista: Abílio Elo Nini
Editór: Rafael Ximenes de A. Belo
