OEKUSI, 05 Fevereiru 2026 (TATOLI) – Diresaun Rejionál Infraestrutura (DRI) sei dezloka Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI,I.P) hodi normaliza estrada Sikone ne’ebé kotu totál iha aldeia Fatubijae suku Bobokase hodi liga ba suku Kutete sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
“Ita komunika ona xefe suku Kutete, bainhira nia ba hatama proposta kona-ba estrada ne’ebé kotu iha Sikone, tanba estrada ne’e liga ba Kutete mai vila, ne’ebé husi DRI fó esperansa ba komunidade sira katak, ita hein lai, kuandu udan-been menus ona, kondisaun rai mós maran, entaun intervensaun liuhusi IGEADI sei dezloka ba atu halo normalizasaun, tanba estrada ne’e kotu karreta labele liu só motorizada,” Diretór DRI, Remigío Nuno Sila dehan, iha Oekusi ohin.
Tuir nia, iha alternativa seluk, DRI informa ona ba autoridade komunitária no komunidade sira katak, atu identifika dalan alternativa seluk, tanba fatin ne’e la’ós foin mak akontese maibé kada tinan, to’o tempu udan sempre kotu.
“Se ita loke fali husi fatin seluk, ha’u hanoin sei laiha problema, tanba estatutu rai-halai risku ba erozaun, entaun kuda udan tuun, sempre akontese rai-halai iha fatin ne’e,” nia hateten.
Notísia relevante:PM inaugura projetu reabilitasaun estrada kilómetru 14 iha Pante Makasar
Antes ne’e, komunidade suku Kutete, Mozinho Quebo, preokupa, tanba estrada Sikone kotu kuaze semana rua ona maibé seidauk normaliza, nune’e difikulta movimentu transporte liu-liu karreta atu transporta sasán ba merkadu.
“Dalan ba Kutete tenke liuhusi Sikone duni, maibé agora kotu ona besik semana rua ona maibé husi parte Governu seidauk mai haree, se husik de’it hanesan ne’e, fó terus mai ami, atu ba fa’an sasán iha merkadu Maumate no merkadu Numbei, tanba karreta mai to’o ne’e labele liu, só motorizada mak bele,” nia hateten.
Xefe aldeia Fatubijae, Benedito Obe, rezidente iha Sikone lembra katak, estrada referida kotu tanba dezastre naturál, udan boot hodi rezulta rai-halai.
“Estrada ida-ne’e komunidade suku rua mak ultrapasa, suku Bobokase rasik no suku Kutete ba to’o fronteira postu UPF Nun-Ana, maibé iha semana kotukliuba kotu iha tempu udan, agora karreta sira labele liu, ne’ebé ita espera tempu-badak Governu liuliu obra públika bele tau matan,” nia hateten.
Notísia relevante:Estrada iha Bonemse Naimeko ba Leolbatan Monemeko ameasada kotu totál
Lembra katak, katak, iha 2023 estrada rurál ne’e hetan reabilitasaun hosi empreza Lifau Indah Unipesoál Lda, ho valór kontratu hamutuk $2,623,959.80, orsamentu ne’e Autoridade prevee hosi Orsamentu Jerál Estadu (OJE) 2022.
Distánsia ba reabilitasaun estrada rurál ne’e, hahú husi suku Bobokase liga ba suku Kutete, ho distánsia kilómetru 14, estrada ne’e nia medida metru-lima, kompleta ho valeta, ponte boot ida no ponte ki’ik hamutuk 10 no morru kontensaun.
Jornalista: Abílio Elo Nini
Editór: Rafael Ximenes de A. Belo
