DILI, 07 Fevereiru 2026 (TATOLI)–Primeiru-Ministru (PM), Kay Rala Xanana Gusmão, apela ba manorin sira hotu atu hanorin labarik sira ho literasia no numerasia husi ki’ik kedas nune’e labarik bele hatene sura (kálkulu) no hatene lee.
“Ohin mós ministra edukasaun esplika tiha ona problema hanorin nian. Ida-ne’e loos. Apelu ida ba profesór sira hanorin husi ki’ik ne’e. Ida-ne’e mak importante no ida-ne’e maka baze,” PM Xanana dehan ba jornalista sira iha Suku Bokelolo, Postu Administrativu Laulara, Munisípiu Aileu, Sábadu ne’e.
Nia esplika bainhira labarik sira iha nivel literasia no numerasia forte ona mak sira fiar-an atu bele hetan susesu di’akliu iha nivel ensinu tuirmai.
Ministra Edukasaun, Dulce de Jesus Soares haktuir estudante sira iha eskola CONCIN, sira-nia nivel literasia iha 2⁰ ano kapa’as tebes.
“Ema sempre hanoin katak labarik ki’ik 1⁰ to’o 3⁰ ano ladún importante maibé iha eskola ida-ne’e hatudu ba ita katak importante eduka husi ki’ik,” ministra dehan.
Govenante ne’e subliña pratika ida-ne’e hahú ona iha 2025, no iha 2026 Ministériu Edukasaun kontinua servisu maka’as atu muda atitude ida-ne’e hodi bele hetan edukasaun ida-ne’ebé kualidade hahú husi nivel ensinu ne’ebé ki’ik liu.
Tanba, tuir nia katak bainhira halo teste internasionál la teste ensinu sekundáriu, maibé teste nivel literasia iha ensinu báziku, liuliu iha 1⁰ to’o 3⁰ ano.
Govenante ne’e realsa laiha razaun ida atu dehan katak labarik Timor-Leste kontinua ho tasa literasia ho numerasia ne’ebe ki’ik.
“Iha finál tinan-ne’e sei halo teste ba nivel literasia no numerasia atu sukat ita-nia dezempeñu no estudante sira-nia dezempeñu, nune’e ita relata fali ba Primeiru-Ministru no Vise-Primeiru-Ministru ne’ebé tutela ba área sosiál inklui edukasaun,” Dulce tenik.
Jornalista: Osória Marques
Editór: Xisto Freitas da Piedade
