DILI, 10 Fevereiru 2026 (TATOLI)—Primeiru-Ministru, Kay Rala Xanana Gusmão, akompañadu husi membru Governu seluk inklui Embaixadór Malázia ba Timor-Leste, Dato’ Amarjit Sarjit Singh, hala’o enkontru ho investidór Grupu Malasyan Resources Corporation, hodi halo investimentu ba área konstrusaun iha Timor-Leste.
Primeiru-Ministru, Kay Rala Xanana Gusmão, hateten ohin sira simu investidór ho ninia delegasaun sira husi Malázian Resource Corporation, ne’ebé iha interesadu atu investe iha Timor.
“Entaun iha área oioin mak sira atu investe liuliu iha área konstrusaun nomós iha área seluk tan, tanba ida-ne’e mak ami ko’alia ona hodi buka sira-nia área investe ne’ebé sei ligadu ho MPRM, MF, MPIE, MCI, atu buka neineik iha sa’ida de’it mak sira bele kontribui no bele mai investe”, Xefe Governu informa ba jormalista sira iha Palásiu Governu, ohin.
Signifika, bainhira Timor-Leste sai ona membru plenu ba ASEAN sei loke espasu ba investidórsira hodi halo investe no ida-ne’e sai mós hanesan oportunidade ba kooperasaun bilaterál nian entre nasaun rua.
Diretór Jerál Grupu Malasyan Resources Corporation, Dato’Imran Salim, hato’o agradesementu ba Primeiru-Ministru, Kay Rala Xanana Gusmão, ne’ebé bele iha oportunidade ba hasoru malu hodi diskute kona-ba pontu importante balun ne’ebé sira atu investe iha Timor.
“Ha’u hanoin ita iha diskusaun ne’ebé produtivu tebes ohin loron, ida ne’ebé iha rezultadu di’ak, tamba ne’e ami hein katak ami-nia partisipasaun sei naruk no forte tebes iha futuru mai,” nia dehan.
Entretantu, iha enkontru kortézia ne’e marka mós prezensa husi membru Governu seluk hanesan, Ministra Finansa, Ministru Planeamentu Investimentu no Estratéjiku, Ministru Komérsiu Indústria no Ministru Petróleu no Rekursu Minerál.
Jornalista : Alexandra da Costa
Editór : Cancio Ximenes
