OEKUSI, 13 Fevereiru 2026 (TATOLI) – Prezidente Komisaun Nasionál Eleisaun (CNE), José Belo, rekomenda ba Governu no Parlamentu Nasionál (PN) atu aumenta númeru Komisáriu, nune’e bele garante prestasaun serbisu órgaun eleitorál nian iha eleisaun munisipál ba polítika dezentraliasaun no podér lokál.
José Belo propoin rekomendasaun ne’e, perante audénsia públika ho Membru Parlamentu Nasionál (PN) husi Komisaun A trata asuntu kona-ba konstituisaun no justisa, iha salaun CNE Rejiaun Administrativa Espesiál Oekusi Ambeno (RAEOA), sesta ne’e.
“Difikuldade ne’ebé CNE enfrenta, tanba eleisaun tinan oin ne’e sei fazeadamente, maibé eleisaun ba Prezidensiál ne’e mós sei akontese, númeru komisáriu ne’ebé daudaun iha na’in-hitu de’it, tanba evoluasaun iha munisipíu la to’o, iha munisípiu 14 kedas. Entaun, ita presiza mós aumenta rekursu liu-liu komisáriu sira. Tan ne’e, ohin deputadu sira-nia vizita mai CNE Oekusi importante, atu observa direita kondisaun reál ne’ebé CNE ho STAE iha, nune’e bele ajusta ita-nia hanoin ba futuru festa demokrásia ne’ebé sei mai, bele garante prestasaun serbisu sai di’akliu tan,” José Belo, hato’o iha ámbitu audiénsia públika iha salaun CNE Oekusi, ohin.
Prezidente CNE ne’e, informa, maske rekursu umanu sai dezafiu iha serbisu CNE nian maibé dirijente sira, unidu hodi fahe tarefa atu akumula serbisu ba munisipíu rua to’o tolu, nune’e bele garante demokrasia la’o independente no transparánsia ba públiku.
“Durante ne’e, komisáriu ida kaer munisipiu rua inklui Prezidente CNE rasik hanesan mós, ba to’o Baukau mai to’o Oekusi, ita fahe tempu dalaruma susar uitoan, maibé ita-nia rai no ita realidade, la’ós CNE de’it mak importante maibé órgaun sira seluk mós presiza tau atensaun, maibé ne’e hanesan rekomendasaun de’it, depende ba desizaun husi nível altu, maibé CNE nia preokupasaun mak presiza aumenta komisáriu,” nia hateten.
Notísia relevante:CNE kontinua halo edukasaun sívika kona-ba eleisaun kámara munisipál
Hatan ba rekomendasaun ne’e, Prezidente Komisaun A, Natalino dos Santos, informa, objetivu fizkalizasaun ne’e atu rona direita, liu-liu Komisaun A nia planu atividade anuál halo fiskalizasaun ba iha terrenu atu haree realidade ne’ebé iha, relasaun ho kalendáriu planu Governu nian, katak sei implementa eleisaun munisipál ba polítika dezentralizasaun no podér lokál.
“Intermus institusionál, CNE preparadu liuhusi sira-nia abordajen aprezentasaun ohin, atu hasoru eleisaun tuirmai, tanba sira hatudu ona referénsia iha eleisaun dala-barak ona mak liu, maibé iha tinan oin 2027, sei iha eleisaun rua ka tolu, entaun presiza duni sira-nia preokupasaun atu aumenta komisáriu, maibé tuir lei só iha komisáriu na’in-hitu, ne’ebé Komisaun A rejista preokupasaun ohin, sei lori ba parlamentu depois diskute, haree iha posibilidade alterasaun ba lei órgaun eleitorál sira,” nia hateten.
Nune’e, tuir membru PN ne’e, bele responde situasaun reál ne’ebé parte órgaun eleitorál sira enfrenta iha terrenu, tanba iha 2027 sei iha eleisaun tolu, rua sei simultaneamente – eleisaun Prezidente Kámara Munisipál ho eleisaun asembleia munisipál, hafoin ne’e tama kedas ba eleisaun ba Prezidente Repúblika.
“Entaun sira-nia preokupasaun no sujestaun ne’e pertinente tebes, Komisaun A konsidera, tanba Komisaun A órgaun koleziál ne’ebé mai husi reprezentasaun partidu, daudaun sexta lejistlatura iha bankada lima, entaun ita sei lori asuntu ne’e ba atu haree, iha posibilidade bele halo alterasaun tanba ne’e kompeténsia parlamentu nian,” nia hateten.
Notísia relevante:Komisaun A hakarak fiskaliza funsionamentu administrasaun iha munisípiu lima
Observasaun jornalista Ajénsia Tatoli,I.P, iha audénsia públika ne’e, CNE mós aprezenta planu polítika no progresu preparasaun CNE nian ba eleisaun munisipál iha 2027 inklui eleisaun Prezidente Repúblika.
Jornalista: Abílio Elo Nini
Editór: Rafael Ximenes de A. Belo
