OEKUSI, 11 Fevereiru 2026 (TATOLI) – Komando Polísia Nasionál Timor-Leste (PNTL), Rejiaun Administrativa Espesiál Oekusi Ambeno (RAEOA), ofisialmente, destaka ona Ofisiál Polísia Suku (OPS) na’in-rua iha suku foun Monemeko no Kutete, perténsia sub-rejiaun Pante Makasar.
Notísia relevante:Aniversáriu PNTL iha Oé-Cusse, serbí públiku ho profisionalizmu
Komandante PNTL Oekusi, Superintendente Asistente Polísia, Angelo Quelo, informa, objetivu husi destakamentu Ofisiál Polísia Suku, hanesan estratéjia komandu nian, nune’e polísia hakbesik liután ba komunidade sira.
“Monemeko no Kutete hanesan suku foun foin eleitu iha tinan kotuk, Komandu PNTL mós koloka kedas Ofisiál Polísia Suku iha ne’ebá, tanba suku 20 iha Oekusi tenke hetan hotu membru ida atu serbisu hamutuk ho komunidade no autoridade lokál sira, ne’e estratéjia komando nian, atu polísia besikliu tan ba komunidade sira,” nia hateten iha Oekusi, ohin.
Autoridade polisiál ne’e informa, maske ofisiál na’in-rua ne’e, seidauk hetan transporte hanesan motorizada husi Governu maibé utiliza transporte privadu nune’e bele serbí hamutuk ho povu iha baze.
“Ne’ebé, husi Xefe Suku sira mós hato’o agradese, tanba bele akompaña situasaun iha suku, karik iha problema ruma ka lia-ruma, sira bele hamutuk halo atuasaun,” nia hateten.
Notísia relevante:MAE pose xefe suku eleitu Kutete no Monemeko iha Oekusi
Xefe suku Kutete, José António Bana, hateten, orgullu tanba prezensa Ofisiál Polísia Suku importante atu serbisu hamutuk ho komunidade sira iha baze.
“Ami agradese, maske foin suku foun maibé komandu mós la haluha ami, hodi destaka nia membra ida ami suku. Ami orgullu tanba, dalaruma iha mis-komunikasaun ba rai, violénsia doméstika, entaun komunidade sira hakbesik ba suku hato’o kedas keixa, depois observa mós situasaun iha suku, tanba ami dook, entaun prezensa PNTL importante ba komunidade,” nia orgullu.
Notísia relevante:Janeiru, PNTL Oekusi rejista kazu 22 inklui abuzu seksuál kontra minoridade tolu
Entretantu, totál populasaun iha suku Kutete hamutuk 1.800 resin husi totál uma-kain 433 komposta husi aldeia Mahata uma-kain 274 no aldeia Kutete 159.
Jornalista: Abílio Elo Nini
Editór: Rafael Ximenes de A. Belo
