OEKUSI, 14 Fevereiru 2026 (TATOLI) – Koordenadór Prokuradória Jerál Primeira Instánsia Rejiaun Administrativa Espesiál Oekusi (RAEOA), José Elo, rekomenda ba Parlamentu Nasionál (PN) liuhusi Komisaun A ne’ebé trata asuntu kona-ba konstituisaun no justisa, atu kria lei espesiál ida ba adolsente atu kondena krime ne’ebé prátika husi minoridade sira.
Notísia relevante:PJR pose Prokuradór José Elo nu’udar Koordenadór Ministériu Públiku Oekusi
Prokuradór José Elo, propoin rekomendasaun ne’e, perante fiskalizasaun deputada sira husi Komisaun A ne’ebé trata asuntu kona-ba konstituisaun no justisa, iha Ministériu Públiku Oekusi, sesta ne’e.
“Ami rekomenda ba deputadu sira liu-liu trata asuntu justisa ne’ebé ohin mai fiskaliza iha ami-nia fatin, lei espesiál ida kona-ba sosiu-edukativu, presiza kria ida atu kondena krime ne’ebé prátika husi minoridade, ida-ne’e mak ami hato’o iha mumentu fizkalizasaun ne’e,” nia hateten bainhira depautadu sira husi komisaun A hala’o fiskalizasaun iha Ministériu Públiku Oekusi, sesta ne’e.
Tuir nia, durante tinan barak, setór justisa preokupa, kuandu krime ruma ne’ebé prátika husi minoridade, laiha lei ruma atu kondena, tanba ne’e nu’udar akuzadór propoin ba uma fukun Parlamentu Nasionál atu konsidera.
“Ha’u la haree hetan maibé ein- prinsípiu to’o ohin loron, minoridade ne’ebé prátika krime, seidauk iha lei ida ba adolsente, atu kondena sira, nu’udar akuzadór husu presiza tau atensaun, iha futuru presiza konsidera,” nia rekomenda.
Notísia relevante:Ministériu Públiku Oekusi presiza edifísiu foun no fatin ba objetu apreendidu
Hatan ba rekomendasaun ne’e, Prezidente Komisaun A, Natalino dos Santos, rekoñese durante tinan barak, seidauk iha lei própria ida atu kondena minoridade sira-ne’ebé prátika krime iha sosiedade nia leet.
“Ida-ne’e mak ami-nia objetivu mai fiskaliza atu rona direita prokuradór sira nia preokupasaun, tanba ita-nia rai lei atu kondena krime ba minoridade sira seidauk iha, tanba ne’e ami rejista depois sei lori ba parlamentu atu diskute, haree mós lei judisiáriu balun ita bele halo alterasaun,” nia hateten.
Jornalista: Abílio Elo Nini
Editór: Rafael Ximenes de A. Belo
