OEKUSI, 11 Fevereiru 2026 (TATOLI) – Iha fulan-Janeiru 2026 ne’e, Autoridade Protesaun Sívil (APC), Rejiaun Administrativa Espesiál Oekusi Ambeno (RAEOA), rejista vítima dezastre naturál hamutuk uma-kain 12, maioria anin sobu uma.
Komandante APC Oekusi, João Sila, hateten, kazu hirak-ne’e akontese iha Janeiru nia klaran, no maioria hetan ona apoia emerjénsia hanesan alimentu (food item) no la’ós alimentu (food item).
“Ita atende ona kazu ba dezastre naturál 12. Kazu hirak-ne’e, maioria anin sobu uma hitu, inundasaun haat no inséndiu ida. kazu sira-ne’e, iha 11 mak konsidera aat kaman no hetan ona apoia emerjénsia, kazu ida mak hetan rekuperasaun materiál konstrusaun tanba aat totál,” nia hataten ba jornalista sira iha Oekusi, ohin.
Komandante ne’e afirma, kazu hirak-ne’e rekolla liuhusi koordenasaun ho lideransa komunitária sira, tanba antes ne’e APC hamutuk ho parseriu sira estabelese ona Komisaun Jestaun Dezastre Suku (KJDS), ne’ebé bainhira akontese dezastre iha baze, sira sempre atualiza mai APC hodi kontinua tuun ba terrenu observa no atribui kedas apoia emerjénsia.
Notísia relevante:SEPS apoia ekipamentu informátiku no mobiliáriu haforsa serbisu APC Oekusi
Autoridade APC ne’e relata, neste mumentu nesesidade food item no la’os food item iha armazeinamentu Oekusi sufisiénte atu fó atendimentu ba dezastre naturál ho situasaun emerjénsia.
“Atualmente sei iha hela atu responde dezastre ho volume ki’ik, husi APC mós relata ona relatóriu ba nasionál, iha tempu-badak sei hetan res-karegas mai Oekusi hanesan food item no non food item, sei mai liuhusi transporte marrítima,” nia hateten.
Jestór sub-rejiaun Pante Makasar, Lorêncio da Cunha, konsidera intervensaun parte APC importante, no Autoridade komunitáriu sira kontribui hodi partilla informasaun ba komunidade atu tau atensaun ba dezastre naturál.
“Tanba komesa Janeiru to’o Marsu ne’e tempu udan nian, ha’u-nia área Pante Makasar mós foin daudaun parte APC mós mai entrega ona apoia emerjénsia. Ne’ebé hanesan autoridade lokál, ita alerta beibeik liuhusi enkontru sira iha suku, katak presiza hela do’ok husi fatin ne’ebé risku dezestre hanesan tasi-ibun, ai-hun boot, ne’ebé ita mós agradese ba Governu liuliu APC tanba la husik ita-nia komunidade sira bainhira hetan dezastre, sempre tuun lori apoia,” nia katak.
Notísia relevante:APC – Asosiasaun Maneo enkontru koordenasaun atu prepara prevene risku dezastre iha Oekusi
Entretantu, tuir dadus APC rejista kazu dezastre naturál durante tinan-2025 hamutuk 221, no 77 mak hetan ona materiál rekuperasaun husi Sekretáriu Estadu Protesaun Sívil (SEPS).
Jornalista: Abílio Elo Nini
Editór: Rafael Ximenes de A. Belo
