OEKUSI, 17 Fevereiru 2026 (TATOLI) – Tuir planu ohin, Autoridade Rejiaun Administrativa Espesiál Oekusi Ambeno (RAEOA), lideradu Régio da Cruz Salu, sei hamutuk ho lia-na’in no komunidade sira, realiza serimónia kulturál hodi husu matak malirin molok reabilita estrada kilómetru 1,8 iha aldeia Sabén, suku Bobometo, sub-rejiaun Oésilo, nu’udar projetu emerjénsia ne’ebé sei ezekuta husi kompañia Pen Seka Unipesoál Lda.
Notísia relevante: Autoridade observa kondisaun estrada Sabén iha Oésilo, sei reabilita ho tipu emerjénsia
Karta konvite ofisiál ne’ebé Ajénsia Tatoli,I.P, asesa segunda ne’e iha Gabinete Prezidente Autoridade RAEOA fó sai ona katak, kompañia lokál Pen Seka Unipessoal,Lda, ne’ebé asina direita husi Diretora Kompañia, Sonia de Sousa Ximenes Guterres, iha segunda-feira ne’e entrega ona konvite ofisiál ba Prezidente Autoridade RAEOA ho Diretór Rejionál sira atu partisipa, tanba estrada referida, dezde tempu okupasaun to’o ohin loron mak foin reabilita.
“Ho haraik aan hakarak konvida Prezidente Autoridade RAEOA, Régio Serventes Roméia da Cruz Salu, ho Diretór Rejionál sira, atu bele mai partisipa iha serimónia kulturál ba projetu emerjensia estrada aldeia Sabén iha suku Bobometo, sub-rejiaun Oésilo,” sita iha konvite ne’e.
Notísia relevante:KAFI prioriza projetu reabilitasaun estrada iha Oekusi
Tanba ne’e, Diretór Rejionál Infraestrutura Oekusi, Remígio Nuno Sila, esplika katak, objetivu husi serimónia kulturál ne’e, atu husu matak malirin ba beiala sira no rai-na’in sira, nune’e bele hafasil ezekusaun projetu reabilitasaun estrada rurál ne’e ho susesu.
“Estrada Sabén presiza hadi’a tanba lokaliza kedas iha fronteira Timor-Leste ho Indonézia, ne’ebé aban ita realiza serimónia kulturál atu husu matak malirin, ne’ebé orsida ha’u sei koordena ho Prezidente Autoridade, aban nia bele partisipa ka lae, hafoin serimónia kompañia sei kontinua kedas hala’o ona serbisu tanba autoridade atribui ona ordén serbisu hodi hein kontratu definitivu,” nia informa ba Ajénsia Tatoli.
Notísia relevante:Waskita sei ezekuta projetu adisionál kilometru haat iha Oesilo inklui ponte Noél-Ekat
Antes ne’e, Xefe Aldeia Sabén Abílio Ili, aprezenta preokupasaun katak, durante tinan barak difikulta movimentu transporte sira bainhira tula pasiénte ba ospitál inklui difikulta estudante sira asesu ba eskola.
“Suku sira seluk, sira-nia estrada di’ak ona, hela ami-nian mesak mak seidauk hadi’a. ami hela besik tan fronteira hatudu imajén ladi’ak ba nasaun viziu, depois ami-nia oan sira ba eskola tenke hakur tahu barak ne’e, kuandu iha ema ruma moras mós karreta labele asesu tama mai, domingu-domingu dalaruma ami la ba misa tanba igreja iha mota sorin Oémanu,” nia hateten.
Jornalista: Abílio Elo Nini
Editór: Evaristo Soares Martins
