VIKEKE, 18 Fevereiru 2026 (TATOLI)—Pároku Parókia Uatulari, Pe. Heriberto Soares Pedro, hateten tempu kuarezma sai kultura Igreja Katólika nian ne’ebé konvida sarani sira fila bá Maromak atu hametin fiar-na’in nian.
“Ohin ita selebra kuarezma sai hanesan tradisaun ida ba moris fiar nian, hodi fó tempu ida ba ita, ne’ebé sai tempu nakonu ho grasa atu ema idaidak ho kompromisu hodi halo orasaun ba ita-nia an iha moris loro-loron nian. Tan ne’e, kuarezma mak sai hanesan tempu ne’ebé boot atu ita fila ba idaidak nia-an rasik hodi sente Maromak nia domin ida-ne’e,” Pe. Heriberto dehan iha selebrasaun misa Kuarta Sinza iha Parókia Uatulari, Kuarta ne’e.
Nia esplika bainhira sarani sira fila bá Maromak, bele sente esperiénsia dame no ksolok loloos ne’ebé Maromak hakarak tanba Maromak mak dame nian hun no Maromak mak istória nia na’in.
“Reflete ba tempu kuarezma mak konvida fila bá uma, fila bá família, fila bá moris, ita fila bá toos no natar no fila bá Maromak. Nune’e, bolu filafali ita bá esperiénsia lakon buat oioin hanesan ita lakon ona salvasaun no halo ita lakon ita-nia identidade moris nu’udár kristaun,” amu haktuir.
“Kuarezma mós sai hanesan oportunidade ida ba ita hodi rona buat foun ruma iha ita-nia moris. Tan moris husi Maromak nian futar liafuan ne’ebé sai nu’udár fahe inspirasaun ne’ebé inspira ita fahe obra Maromak nian iha idaidak nia moris,” nia subliña tan.
Entretantu, iha selebrasaun misa kuarta sinza ne’e, amu selebrate akompañada husi madre sira kose ahukdesan ho riska sinál krúz ba sarani sira-nia rentos.
Misa ne’e partisipa husi autoridade lokál sira iha Postu Uatulari, Komadante Eskuadra Polísia Nasionál Timor-Leste (PNTL) Uatulari no sarani sira.
Jornalista: Vitorino Lopes da Costa
Editór: Xisto Freitas da Piedade
