VIKEKE, 13 Fevereiru 2026 (TATOLI)—Xefe Suku Dilór, Postu Administrativu Lakluta, Jacinto Ximenes, informa implementasaun obra Programa Nasionál Dezenvolvimentu Suku (PNDS) adisionál ne’ebé halai ba konstrusaun sentru investimentu haki’ak fahi iha Suku Dilór, daudaun ne’e atinje ona 65%.
“Kona-ba progresu implementasaun programa sentru haki’ak fahi iha ami-nia suku oras-ne’e ajinte ona 65%. Obra ne’e husi orsamentu adisionál PNDS nian ba tinan 2025 ne’ebé aloka ba Munisípiu Vikeke hodi implementa iha postu Lakluta,” Jacinto ba TATOLI iha Postu Vikeke Vila, Sesta ne’e.
Autoridade Suku Dilór ne’e relata katak husi atinjimentu ne’e obra fízika ba sentru fahi luhan ne’e konstrui uma hamutuk tolu kompostu husi uma medida 24×12 ida, medida uma 7×8 ida no uma ida ho medida 5×5. Husi obra ne’e, konsege konklui ona uma tolu no ne’ebé seidauk mak hanesan instalasaun bee ba fahi luhan no morru protesaun.
“Ita-nia atinjimentu ne’e ita konsege konstrui ona uma ba fahi luhan rua no uma ba traballadór ida. Hela mak instalasaun bee ba fahi luhan laran no morru protesaun. Tanba ne’e, orientasaun ne’ebé ami simu katak ekipa Hunan-Xina mak sei halo instalasaun no harii morru ne’e,” Jacinto esplika.
Nia dehan, sentru fahi luhan uma hamutuk unidade rua, ida ba haki’ak fahi no uma ida ba kuidadu fahi nian (abastesimentu). Ba etapa dahuluk ne’e sei haki’ak fahi hamutuk sanulu (10), inan ualu (8) no aman rua (2).
Entretantu, obra investimentu haki’ak fahi iha Suku Dilór ne’e hahú implementadu iha fulan-Novembru 2025, sei konkluidu iha tinan ida-ne’e. Obra referida gasta orsamentu adisionál hamutuk $53.400,00.
Jornalista: Vitorino Lopes da Costa
Editór: Xisto Freitas da Piedade
