DILI, 20 Fevereiru 2026 (TATOLI)—Konsellu Ministru aprova mós projetu proposta rezolusaun Parlamentu Nasionál nian, ne’ebé aprezenta husi Ministru Justisa, Sérgio da Costa Hornai, ba aprovasaun tratadu estradisaun ASEAN, instrumentu jurídiku ida-ne’ebé ho objetivu atu hametin kooperasaun jurídika entre Estadu-Membru hodi kombate krime transnasionál.
Ministru Justisa, Sérgio da Costa Hornai, hateten ohin sira aprezenta rezolusaun ida-ne’ebé propoin ba Konsellu Ministru kona-ba akordu ka tratadu estradisaun ninia, atu hetan apresiasaun no aprova hodi lori ba iha Parlamentu Nasionál ratifika.
“Ne’ebé, proposta ne’e ita asina depois liu tiha loron 10-resin, ita sai Estadu membru ASEAN. Ministériu Justisa halo reuniaun iha Filipina iha fulan-Novembru liubá entre loron 14 to’o 16, ita deside hodi fó asinatura ba akordu estradisaun ninian,” Ministru Justisa ne’e informa ba jornalista sira iha Ministériu Finansa, ohin.
Akordu ida-ne’e interesadu tebes ligadu ho servisu kooperasaun ba matéria penál internasionál ninian, ne’ebé ohin hetan ona aprovasaun no hotu-hotu aseita para lori ba Parlamentu Nasionál, tanba nu’udar Estadu parte ida tenke iha obrigasaun para bele haree lei estruturante sira liuliu iha reziaun Ázia ninia.
Normalmente tratadu ne’e estabelese prinsípiu no prosedimentu ba entrega ema sira-ne’ebé prokura ba efeitu/finalidade akuzasaun, julgamentu ka kumprimentu pena nian, hodi define infrasaun sira-ne’ebé bele hetan estradisaun, hodi define kondisaun no fundamentu sira-ne’ebé obrigatóriu no diskrisionáriu ba rekuza, nune’e mós garantia prosesuál no umanitária sira neʼebé bele aplika.
Tratadu ne’e asina husi Ministru Justisa, Sergio Hornai, hamutuk ho nia omólogu sira ASEAN nian, iha Enkontru Ministru Justisa ASEAN (ALAWMM) nian ba da-13, ne’ebé hala’o iha loron 14 fulan-Novembru tinan 2025, iha Manila, Filipina.
Jornalista : Alexandra da Costa
Editór : Cancio Ximenes
