DILI, 23 Fevereiru 2026 (TATOLI)—Ministériu Turizmu liuhusi Dirasaun Nasionál Dezenvolvimentu Turístiku, apela ba vizitante sira atu nafatin kuidadu ambiente iha sítiu Turístiku Na’in Feto Ramelau.
Diretór Nasionál Dezenvolvimentu Turístiku, Luís Imanuel Doutel, husu ba vizitante no peregrinu sira bainhira ba vizita Na’in Feto Ramelau, tenke kuidadu ambiente katak labele soe foer arbiru no labele estraga fasilidade ne’ebé kompañia sira implementa hela labele lori alkol (tua) ba hemu iha ne’ebá, no labele gás motorizada hodi halo barullu iha komunidade inklui fauna (animál) sira.
“Vizitante sira bele lori rasik ida-idak nia hahan, maibé bainhira sira konsumu iha fatin refere tenke soe foer tuir nia fatin, tanba Ramelau mós envolve iha área protejida Ministériu Agrikulura Pekuária Peskas no Floresta liuhusi Dirasaun Floresta,” Diretór ne’e informa ba Agênsia Tatoli iha nia kna’ar fatin, Villa Verde, ohin.
Nia dehan, hanesan área protejida ninia sensitividade ambientál ne’e maka’as bele afeta ba ai-horis, rai no fauna (animál) sira-ne’ebé moris iha foho Ramelau.
“Tanba ne’e iha planu sira sei konstrui plaka informativu ida atu ajuda sai matadalan hodi regula (guide) vizitante sira kumpre, tanba plaka informativu ne’ebé antes ne’e harii aat tiha ona,” nia relata.
Tanba Ramelau la’ós hanesan sítiu turístiku ida maibé hanesan mós fatin sagrada no relijiozu ida-ne’ebé atrai demanda kada loron hodi halo orasaun ba estátua Na’in Feto Ramelau.
Iha biban ne’e, Vizitante, Dahlio Pereira, hateten nia parte konsidera sítiu turístiku Na’in-Feto Ramelau la’ós de’it hanesan fatin turizmu maibé mós nu’udar fatin sagrada ne’ebé peregrinu sira sempre ba hasa’e orasaun.
“Nune’e mensajen ne’ebé governante sira solisita ne’e di’ak tebes atu ita nafatin kuidadu ita-nia ambiente fatin sagradu ida-ne’e, tanba bainhira so’e fo’er arbiru sei estraga paisajen no natureza sei hirus ita,” nia dehan.
Nia hatutan, ho fasilidade infraestrutura ne’ebé Governu prepara ne’e bele fasilita ita hanesan vizitante sira hodi garante nafatin fatin ne’e iha proibidu ba ambientál no fó benefísiu kontribuisaun rendimentu lokál ba komunidade inklui Estadu tamba ema ne’ebé ba vizita fatin refere la’ós hein fin semana maibé kada loron.
Jornalista : Alexandra da Costa
Editór : Cancio Ximenes
