DILI, 27 Fevereiru 2026 (TATOLI) – Kompañia aérea Aero Dili alarga, iha Marsu no Maiu, nia ligasaun direta entre Dili, Malázia no Austrália.
Diretór-Ezekutivu Aero Dili, Lourenço de Oliveira, informa katak vou internasionál ba Malázia sei lansa iha 28 Marsu no, tuir oráriu, semana ida semo dala-rua entre loron tersa-feira no sábadu.
“Ida-ne’e ita kompleta ita-nia vou hodi hatán filafali sira semo mai ka la’e. Ita semo bá tuir lei aviasaun nian, katak ita semo bá, sira mós semo mai”, Lourenço de Oliveira hateten iha Otél Timór, ohin.
Relasiona ho vou internasionál bá Darwin-Austrália, emprezáriu ne’e adianta katak sei lansa iha loron 24 Maiu no, tuir oráriu, semana ida semo dala-rua iha loron tersa-feira no domingu.
“Tersa ita sai husi ne’e tuku 14h00 liu, to’o ne’ebá lori oras ida, ita filafali mai tuku 16h00. Domingu ita semo ba dadersán tuku 08h00, filafali mai tuku 10h00”, nia informa.
Tuir nia, maski Aero Dili alarga tan ninia vou bá nasaun lubun ida, maibé seidauk iha hanoin aumenta tan aviaun foun, tanba aviaun rua ne’e bé iha, kada fulan seidauk halo to’o oras 300.
“Tuir padraun, aviaun ida semo halo oras 300 iha fulan ida, maibé ita-nia aviaun rua kada fulan foin halo oras 200-resin, ne’ebé ita seidauk bele hanoin aumenta aviaun. Maibé, se ita-nia merkadu ne’e la’o di’ak, ita sei aumenta aviaun ida tanba iha planu sei semo tan bá Filipina no Tailándia”, konklui.
Notísia relevante: Aero Dili inaugura vou diretu entre Dili no sidade Xiamen
Jornalista: Arminda Fonseca
Editora: Maria Auxiliadora
