BEIJING, 05 Marsu 2026 (TATOLI) – Porta-voz Asembleia Popular Nasionál Xina (ANC) koñesidu nu’udar Órgaun Prinsipál Lejislativu Xineza, Lou Qinjian, defende katak Xina ho EUA tenke respeita malu hodi promove koezisténsia pasífika no hametin koperasaun benefísiu mútuo entre nasaun rua.
Lou Qinjian hato’o ninia pozisaun ne’e iha Kuarta-Feira foin lalais durante konferénsia imprensa ne’ebé mak realiza iha Salaun-boot Povu Xineza, iha Kapitál Beijing.
Nia hateten Xina no EUA tenke sai parseiru no amigu ba malu: “Vizaun husi Xina no EUA mak fó apoiu ba malu hodi atinji susesu no prósperu hamutuk iha prospetiva kontreta ida-ne’ebé mak bele alkanse hamutuk.”
Lou énfaze katak diplomasia entre Xefe Estadu nasaun rua sempre ezerse papél insubstituível iha orientasaun estratéjika relasaun bilaterál.
Nia relata katak dezde tinan kotuk Prezidente Xineza, Xi Jinping no Xefe Estadu EUA Donald Trump sempre mantein kontaktu regular iha ne’ebé sempre konribui ba oriensaun relasaun bilaterál nasaun rua nian iha evolusaun ida-ne’ebé mak estavel.
Nia salienta katak bazeia ba faktu, Xina no EUA sempre manan ho kooperasaun no lakon konfrontasaun.
Liu komenta katak bainhira parte rua hatudu fiel ba malu no foti asaun hamutuk iha espíritu igualdade, respeitu no benefísiu mútuo hodi serbisu hamutuk iha haburas koperasaun no hamenus diverjénsia mak relasaun nasaun rua sei alkanse ho forma estavel.
Nia enfatiza katak Xina prontu atu hametin komunikasaun ho EUA iha nível hotu hodi kria espasu luan ba koperasaun, maibé iha tempu hanesan Xina sempre kesi ba ninia prinsípiu hodi nafatin defende ninia soberania, seguransa no dezenvolvimentu.
Antes nia ramata ninia deklarasaun, líder ne’e mós destaka importánsia husi interkambiu entre lejisladór Xineza no EUA, iha ne’ebé nia konsidera importante ba hametin relasaun di’ak entre nasaun rua.
Jornalista: Filomeno Martins
Editór: Rafael Ximenes de A. Belo
