BOBONARU, 12 Marsu 2026 (TATOLI)-Primeiru Ministru, Xanana Gusmão, husu ba kamada intelektuál, veteranu, konfisaun relijioza, juventude, sosiedade sivíl, iha munisípiu Bobonaru atu hamriik iha filleira ida ho lema Sama-Sama Bobonaru Kerja (SAMBOKER) atu apoia autoridade munisipál hodi simu implementasaun podér lokál iha futuru.
Iha avaliasaun kondisaun mínima, Xefe Governu dehan munisípiu Bobonaru hetan muito bom, maibé labele kontente ho rezultadu ida-ne’e tanba presiza kompleta rekomendasaun balun husi Ministériu Administrasaun Estatál (MAE).
Notísia relevante: Relatóriu avaliasaun indika munisípiu lima hetan ‘muito bom’
“Imi tenke ajuda malu hamriik iha partidu ida de’it ne’e mak naran SAMBOKER ‘Sama-sama Bononaru Kerja’ hodi serbí rai Bobonaru, buka hanorin joven sira atu partisipa iha dezenvolvimentu. Labele hanoin ba imi nia-an rasik, grupuizmu, partidarizmu no sukuizmu. Fó hanoin katak imi hotu-hotu tenke hamutuk iha objetivu ida hadi’a rai ida-ne’e, hasai povu Bobonaru tomak husi mukit”, Xanana hateten iha ámbitu enkontru avaliasaun kondisaun mínima ba implementasaun podér lokál iha munisípiu Bobonaru, ohin.
Ministru Administrasaun Estatál, Tomás Cabral, reforsa katak Bobonaru presiza kompleta rekomendasaun sira hanesa parte sistema administrativa no halo melloramemtu ba prosedimentu administrativu, hadi’ak servisu jestaun arkivu no aplikasaun sistema arkivu dijitál.
Iha parte rekursu umanu nian mak aumenta volume asisténsia téknika no formasaun tekníka iha área planeamentu administrativu, finansa, aprovizionamentu no informátika liuhusi MAE.
Aleinde ne’e, dezenvolve planu formasaun integradu ba rekursu umanu anuál ne’ebé aliña ho orientasaun no matadalan MAE, kria Standard Operational Procedure no termu referénsia hodi fasilita kolokasaun kuadru tuir nesesidade servisu iha munisípiu. Atualiza baza dadus rekusu umanu munisipál trimestralmente, identifika kabementu orsamentu molok halo rekrutamentu ba forsa traballu foun, reforsa kapasidade munisípiu hodi identifika no rekolla reseita lokál hodi hamenus dependénsia ba orsamentu husi Governu sentrál, kontratu termu sertu ba pesoál apoia área jurídika hodi fasilita interpretasaun legál no prosedimentu iha autoridade munisipál no seluk mak aprovizionamentu.
“Bobonaru iha pontu tolu, administrasaun, rekursu umanu no aprovizionamentu mak menus husi 80%. Ida-ne’e mak ita bele hadi’a hodi la’o ba oin”, ministru afirma.
Prezidente Autoridade Munisípiu Bobonaru, Paulo Moniza Maia, kompromete sei konsidera rekomendasaun hirak ne’e atu hadi’a, nune’e ba oin bele hetan rezultadu ida di’ak liután atu hakat ba podér lokál.
“Ami husu ba Primeiru-Ministru atu entrega poder lokál mai ami. Munisípiu Bobonaru preparadu atu simu Governu lokál”, nia garante.
Xefe suku Raifun,Domingos Salvador, apresia ho programa ne’e no prontu apoia autoridade munisípiu hadi’a rekomendasaun husi MAE.
“Ami sei hamutuk ho intelektuál, membru Governu sira, membru parlamentu sira, nune’e ami bele alkansa ba rezultadu 100% muito bom”, dehan.
Iha diálogu ne’e, hetan partisipasaun másima husi membru Governu no membru Parlamentu, intelektuál, sosiedade sivíl, konfisaun relijioza, juventude, funsionáriu, no militár sira.
Notisía relevante: CCI-TL Bobonaro preparadu simu poder lokál-desentralizasaun administrativa
Jornalista: Sergio da Cruz
Editora: Maria Auxiliadora
