DILI, 27 Marsu 2026 (TATOLI)–Ministru Interiór, Francisco da Costa Guterres, hateten, nia parte orienta ona ba Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos no Segundu Komandante Jerál, Komisária Asistente Natercia Soares Martins atu promove komunikasaundi’ak entre membru sira.
Governante ne’e hato’o asuntu ne’e tanba iha semana ikus ne’e Superintendente Polísia Julia Gama, ko’alia abertamente iha mídia sira kona-ba kanselamentu promosaun no problema internál sira iha PNTL.
“Ha’u husu ona Komandante Jerál atu kria komunikasaun di’ak entre sira. Entre sira mós presiza iha komunikasaun, presiza mós reuniaun beibeik, presiza mós ko’alia ba malu beibeik, atu dehan katak lae Ofisiál Superiór, ita mak tenke asegura instituisaun ida-ne’e, institusaun ida-ne’e ninia lala’ok di’ak, profisionalizmu ne’e asegura husi Ofisiál Superiór sira ne’e mak importante,” Ministru hato’o ba jornalista sira hafoin partisipa iha serimónia aniversáriu ezisténsia PNTL ba dala-XXVI, ne’ebé hala’o iha Palásiu Governu, Sesta ne’e.
Nia dehan, tama ona Polísia, hakarak ka lakohi tenke obdese ba regra ne’ebé mak regulariza membru sira.
“Ami mós haree hela halo diskusaun ho nia (Julia Gama) hotu para depois foti desizaun sira ne’ebé di’ak para kestaun sira ne’e dalabarak ne’e seidauk iha komunikasaun di’ak,” nia akresenta.
Notísia relevante : Komisáriu Asistente Afonso dos Santos hakarak hasa’e profisionalizmu PNTL
Governante ne’e bolu ona Komisáriu Afonso dos Santos no Segundu Komandante Jerál, Natércia hodi kria komunikasaun no rezolve problema internál instituisuan ho di’ak.
“Para depois ita buka ajuda nia para atu tama filafali iha Ofisiál Superiór ida,” nia katak.
Guterres hateten, maski Superintendente Julia Gama lakon direitu ba promosaun, nia sei hetan promosaun hafoin estrutura foun rezolve tiha problema.
“Ha’u bele hatene nia problema saida, ha’u bele hanoin nia lakon ninia direitu, nia iha de’it demora tanba iha de’it kestaun balun, maibé ida-ne’e ami daudaun haree hela hodi halo revizaun,” nia katak.
Ministru hatutan: “Ita asegura nia para nia labele lakon direitu, maibé tenke tuir regras ne’ebé mak iha. Tanba ne’e agora ami haree hela lei sira ne’e kuandu lei sira ne’e ita halo hotu ona revizaun mak ita haree buat sira ne’e.”
Julia Gama sei promovidu maibé sei haree didi’ak nia regra nune’e ba oin membru Polísia bele la’o tuir para instituisaun PNTL.
“Sira hotu ne’ebé hakarak tama Polísia tenke obdese regras ne’ebé mak iha no regulariza, sé nia haksoit sai husi regras ne’e automátikamente ita tenke aplika sansaun disiplinar ba nia tanba ita-nia instituisaun ne’e hakarak sira tenke profisionál no disiplina para hala’o serbisu ne’e didi’ak,” nia katak.
Ministru mós husu ona ba estrutura foun hodi komunika ho Julia Gama ne’ebé ko’alia kona-ba nia intervensaun.
“Ha’u fiar katak sira na’in-rua ne’e idakidak iha nia kapasidade. Tanba ne’e mak ha’u fiar katak sira sei jere ne’e ho didi’ak no komunikasaun entre sira ne’e sei loke reuniaun regulár para depois ko’alia ba malu, dudu Ofisiál Superiór ne’e para sente katak Polísia ne’e la’ós ema ida nian. Ne’e para instituisaun sai forte no forsa atubele kontribui ba pás no kontribui ba dezenvolvimentu rai ida-ne’e,” nia dehan.
Tuir Ministru, Polísia sira presiza promove diálogu nune’e bainhira mandatu ramata bele husik buat di’ak ba jerasaun foun.
Jornalista : Natalino Costa
Editora : Julia Chatarina
