DILI, 11 Abríl 2026 (TATOLI) – Vise Prezidente Estadu Unidu Amérika (EUA), JD Vance, no ofisiál Iraun to’o ona iha kaptiál Pakistaun, Islamabad, hodi komesa negosiasaun sezarfogu.
Ekipa Iraun no EUA to’o iha Islamabad Sábadu (11/04) no simu direta hosi Primeiru Ministru Pakistaun, Shehbaz Sharif.
Tuir reportajen Ajensia Notisioza Tasnim, hafoin to’o iha sidade kapital ne’e, vise-prezidente EUA, JD Vance, no autoridade Iraun hala’o enkontru separadamente ho Primeiro Ministru Shehbaz Sharif antes hakat ba negosiasaun sezarfogu.
Enkontru ne’e nu’udar preparasaun inisiál molok hakat ba negosiasaun nível altu entre EUA no Iraun, ne’ebé mak prevista ba Sábadu lokraik (11/04).
Ajensia Notisioza Tasnim Iraun haktuir katak delegasaun Iraun kompostu hosi membru 71, inklui negosiador, espertu na’in, reprezentante media no seguransa.
Ekuantu, delegasaun EUA, ne’ebé mak lidera hosi Vise Prezidente JD Vance kompostu hosi enviadu espesiál Steve Witkoff no Jared Kushner.
Pakistaun louva Vise Prezidente JD Vance ninia esforsu tomak hodi dudu EUA no Iraun avansa ba solusaun diplomátika.
Maske nune’e, Ajensia Notisioza Tasnim nota katak ofisiál Iraun hatudu sinal ne’eb’e mak signifika laiha desizaun final atu hakat ba nogosiasaun iha faze tuir-mai.
Maibé, Primeiru Ministru Sharif ninia parte hato’o katak sira sei esforsu hodi kontinua fasilita negosiasaun entre parte rua hodi atinji progresu dame sustentável.
Antigu embasador Pakistaun ba ONU no EUA, Maleeha Lodhi hateten Pakistaun nia relasaun ho EUA no Iraun di’ak tebes, tanba ne’e mak nasaun ne’e hola pozisaun nu’udar mediador negosiasaun dame ba nasaun rua.
Ho negosiasaun altu-nívél ne’ebé mak la’o dadaun, mundu tomak espera bele atinji solusaun diplomátika hodi hakotu krize kombustivel ne’ebé mak nasaun barak hasoru.
TATOLI
